கண்டிப்பாக யுவன் இருக்கனும்! வெங்கட் பிரபுவுக்கு விஜய் போட்ட கண்டிஷன்?

சென்னை : வெங்கட் பிரபு படம் என்றால் யுவன் சங்கர் ராஜா இருக்கவேண்டும் என்று நடிகர் விஜய் தெரிவித்துள்ளார்.

இயக்குனர் வெங்கட் பிரபு ஒரு படம் இயக்குகிறார் என்றாலே அந்த படத்திற்கு இசையமைப்பாளர் யுவன் சங்கர் ராஜா தான் இசையமைப்பார். இதுவரை, இவர்களுடைய கூட்டணியில் வெளியான, அனைத்து படங்களின் பாடல்களும் பெரிய அளவில் ஹிட் ஆனது என்றே சொல்லலாம். இவர்களுடைய கூட்டணி தற்போது விஜயின் கோட் படம் மூலம் இணைந்துள்ள நிலையில், கோட் படத்தில் இடம்பெற்ற பாடல்கள் ஒரு பக்கம் எதிர்மறையான விமர்சனங்களைப் பெற்றாலும் வெளியான 3 பாடல்களும் யூடியூபில் பல மில்லியன் பார்வையாளர்களை கடந்துள்ளது.

இருப்பினும், யுவன் சங்கர் ராஜா ஆரம்பக் காலத்திலிருந்து இப்போது வரை பல ஹிட் பாடல்கள் மற்றும் தீம் மியூசிக் கொடுத்தாலும், விஜய் படத்திற்குச் சரியான ஒரு இசையைக் கொடுக்கவில்லை என்ற விமர்சனமும் ஒரு பக்கம் இருக்கிறது. இந்த சூழலில், கோட் படத்தில் இசையமைப்பாளர் யுவன் தான் இசையமைக்கவேண்டும் என வெங்கட் பிரபுவுக்கு விஜய் தான் கட்டளையே போட்டாராம்.

படத்தின் கதை சொல்லி முடித்த பிறகு, இசையமைப்பது யார் என்பது பற்றி பேச்சுவார்த்தை நடந்துள்ளதாகவும் கூறப்படுகிறது. அப்போது, விஜய் ” வெங்கட் பிரபு படம் என்றால் கண்டிப்பாக அந்த படத்தில் யுவன் இருக்கவேண்டும். அது தான் என்னுடைய விருப்பம்” எனக் கோட் படத்திற்கு யுவன் இசையமைக்க தன்னுடைய விருப்பத்தைத் தெரிவித்தாராம். இந்த தகவலை வெங்கட் பிரபு சமீபத்திய பேட்டி ஒன்றில் தெரிவித்து இருக்கிறார்.

கோட் படத்தில் இடம்பெற்ற அனைத்து பாடல்களும், விஜய் சார் அனுமதியின்றி தேர்வு செய்யப்படவில்லை. அவர் அனுமதி கொடுத்த பிறகு தான் பாடல் காட்சிகளைப் படமாக்கினோம். ஸ்பார்க் பாடலை கேட்டவுடன் அவருக்கு ரொம்பவே பிடித்துவிட்டது எனவும் வெங்கட் பிரபு அந்த பேட்டியில் தெரிவித்தார். தொடர்ந்து பேசிய வெங்கட் பிரபு கோட் படத்தின் பின்னணி இசை எப்படி இருக்கும் என்பதைப் பற்றியும் பேசினார்.

கோட் படத்தின் பின்னணி இசை வேலைகள் அனைத்தையும் யுவன் முடித்துக்கொடுத்துவிட்டார். மிஷன்: இம்பாசிபிள் படத்தில் வரும் இசைகளைப் போலக் கோட் படத்தில் தீம்ஸ் இடம்பெற்று இருக்கும். படத்தைப் பார்த்துவிட்டு எப்படி இருக்கிறது என்று சொல்லுங்கள் எனவும் வெங்கட் பிரபு கூறினார்.