பாரிஸ் ஒலிம்பிக் : இந்தியாவுக்கு மேலும் ஒரு வெண்கல பதக்கம் ..! அசத்திய ஸ்வப்னில் குசலே ..!

பாரிஸ் ஒலிம்பிக் : பிரான்ஸ் தலைநகரமான பாரிஸில் 33-வது ஒலிம்பிக் போட்டியானது நடைபெற்று வருகிறது. இதில் 196 நாடுகளைச் சேர்ந்த 10,672 வீரர், வீராங்கனைகள் 32 வித்தியாசமான விளையாட்டுகளில் பங்கேற்று விளையாடி வருகின்றனர்.

மேலும், பிரான்ஸ் முழுவதும் 35 மையங்களில் பல்வேறு விளையாட்டுகள் நடைபெற்று வருகின்றன. அதன்படி இன்றைய 6-வது நாளில் 50மீ. ரைபிள் 3 பொசிஷன்ஸ் போட்டியில் இறுதி சுற்றில் இந்திய அணி சார்பாக ஸ்வப்னில் குசலே கலந்து கொண்டார்.

இதில் சிறப்பாக விளையாடிய அவர் இந்தியவிற்காக வெண்கல பதக்கத்தை வென்று உள்ளார். இந்த பதக்கத்தின் மூலம் இந்திய அணி நடைபெற்று வரும் ஒலிம்பிக் போட்டியில் இதுவரை 3 வெண்கல பதக்கங்களை வென்றுள்ளது. இந்த மூன்று வெண்கல பதக்கமும் துப்பாக்கி சுடுதல் பிரிவில் போட்டியில் இருந்து மட்டுமே கிடைத்துள்ளது என்பது குறிப்பிடத்தக்கது.

நடைபெற்ற இந்த போட்டியில் இந்தியாவை சேர்ந்த ஸ்வப்னில் குசேல் 451. 4 புள்ளிகள் பெற்று 3-ம் இடம் பிடித்தார். சீன வீரரான ஒய்.கே. லூ 463.6 புள்ளிகள் பெற்று தங்கம் பதக்கத்தை வென்றார். அவரை தொடர்ந்து உக்ரைன் வீரரான குலீஷ் 461 புள்ளிகளை பெற்று வெள்ளி பதக்கத்தை கைப்பற்றினார்.