ஐசிசி மகளிர் உலகக் கோப்பை: இந்த முறை பரிசுத் தொகை எவ்வளவு தெரியுமா?

டெல்லி :சர்வதேச கிரிக்கெட் கவுன்சில் (ICC), இந்தியா மற்றும் இலங்கையில் செப்டம்பர் 30, 2025 முதல் நடைபெறவுள்ள 13-வது மகளிர் 50 ஓவர் உலகக் கோப்பைப் போட்டிக்கான பரிசுத் தொகையை கணிசமாக உயர்த்தியுள்ளதாக அறிவித்தது. இந்த எட்டு அணிகள் கொண்ட முக்கிய தொடரின் மொத்த பரிசுத் தொகை 13.88 மில்லியன் அமெரிக்க டாலர்கள் (சுமார் ரூ.116 கோடி) ஆகும், இது 2022-ல் நியூசிலாந்தில் நடந்த முந்தைய தொடரின் 3.5 மில்லியன் டாலர்களுடன் (சுமார் ரூ. 29 கோடி) ஒப்பிடுகையில் 297 சதவீத உயர்வை பிரதிபலிக்கிறது.

இந்த பரிசுத் தொகை, 2023-ல் இந்தியாவில் நடந்த ஆடவர் கிரிக்கெட் உலகக் கோப்பையின் 10 மில்லியன் டாலர் (சுமார் ₹83 கோடி) பரிசுத் தொகையை மிஞ்சியுள்ளது. .இந்த அறிவிப்பு, மகளிர் கிரிக்கெட்டின் வளர்ச்சியை ஊக்குவிக்கும் ICC-யின் உத்தி மற்றும் 2024 மகளிர் டி20 உலகக் கோப்பைக்கு முன்பு அறிவிக்கப்பட்ட ஆண்கள் மற்றும் பெண்களுக்கான பரிசுத் தொகை சமநிலை முடிவுடன் ஒத்துப்போகிறது.

13-வது மகளிர் உலகக் கோப்பையின் வெற்றியாளர்கள் 4.48 மில்லியன் அமெரிக்க டாலர்கள் (சுமார் ரூ.37.5 கோடி) பரிசுத் தொகையைப் பெறுவார்கள், இது 2022-ல் ஆஸ்திரேலியாவுக்கு வழங்கப்பட்ட 1.32 மில்லியன் டாலர்களுடன் (சுமார் ரூ.11 கோடி) ஒப்பிடும்போது 239 சதவீத உயர்வாகும். இரண்டாவது இடத்தைப் பிடிக்கும் அணி 2.24 மில்லியன் டாலர்கள் (சுமார் ரூ. 18.75 கோடி) பெறும், இது 2022-ல் இங்கிலாந்து பெற்ற 600,000 டாலர்களுடன் (சுமார் ரூ.5 கோடி) ஒப்பிடும்போது 273 சதவீத உயர்வாகும்.

அரையிறுதியில் தோல்வியடையும் இரு அணிகள் தலா 1.12 மில்லியன் டாலர்கள் (சுமார் ரூ.9.4 கோடி) பெறும், இது 2022-ல் 300,000 டாலர்களில் (சுமார் ரூ.2.5 கோடி) இருந்து உயர்ந்துள்ளது. மேலும், குழு நிலையில் பங்கேற்கும் ஒவ்வொரு அணியும் குறைந்தபட்சம் 250,000 அமெரிக்க டாலர்கள் (சுமார் ரூ.2.1 கோடி) உறுதி செய்யப்பட்ட பரிசுத் தொகையைப் பெறும், மேலும் குழு நிலைப் போட்டிகளில் ஒவ்வொரு வெற்றிக்கும் 34,314 டாலர்கள் (சுமார் ரூ.28.7 லட்சம்) வழங்கப்படும்.

குழு நிலையில் 5 மற்றும் 6-வது இடங்களைப் பிடிக்கும் அணிகள் தலா 700,000 டாலர்கள் (சுமார் ரூ.5.85 கோடி) பெறும், அதே சமயம் 7 மற்றும் 8-வது இடங்களைப் பிடிக்கும் அணிகள் தலா 280,000 டாலர்கள் (சுமார் ரூ.2.34 கோடி) பெறும். இந்தப் பரிசுத் தொகை உயர்வு குறித்து ICC தலைவர் ஜெய் ஷா பேசுகையில் “இந்த நான்கு மடங்கு பரிசுத் தொகை உயர்வு, மகளிர் கிரிக்கெட்டின் பயணத்தில் ஒரு முக்கிய மைல்கல்லாகும். இது மகளிர் கிரிக்கெட்டின் நீண்டகால வளர்ச்சிக்கு எங்கள் உறுதியான அர்ப்பணிப்பை பிரதிபலிக்கிறது. பெண் கிரிக்கெட் வீரர்கள் இந்த விளையாட்டை தொழிலாக தேர்ந்தெடுத்தால், ஆண்களுக்கு இணையாக நடத்தப்படுவார்கள் என்று அறிந்திருக்க வேண்டும்,” எனவும் அவர் தெரிவித்தார்.