சென்னை :சுதந்திரப் போராட்ட வீரரும், இந்திய கம்யூனிஸ்ட் கட்சியின் மூத்த தலைவருமான ஆர். நல்லக்கண்ணு அவர்கள் மறைவுற்ற செய்தி நாடு முழுவதும் அதிர்ச்சியையும் துயரத்தையும் ஏற்படுத்தியுள்ளது. நூற்றாண்டைக் கடந்த பொதுவாழ்க்கையில், விவசாயிகள், தொழிலாளர்கள் மற்றும் பாட்டாளி மக்களின் உரிமைக்காக போராடிய அவரின் மறைவு, அரசியல் உலகிற்கு பேரிழப்பாகக் கருதப்படுகிறது. பல்வேறு அரசியல் கட்சித் தலைவர்கள், சமூக மற்றும் கலைத்துறையினரும் இரங்கல் தெரிவித்து அவரது சேவையை நினைவுகூர்ந்துள்ளனர்.
த.வெ.க தலைவர் விஜய், தனது இரங்கல் செய்தியில், “சுதந்திரப் போராட்ட வீரர், விவசாயிகளுக்காகவும் மக்களின் உரிமைகளுக்காகவும் வாழ்நாளின் பெரும்பகுதியை அர்ப்பணித்த போராளி நல்லகண்ணு அவர்கள் மறைந்த செய்தி மனவேதனை அளிக்கிறது. அவரது இழப்பு நாட்டிற்கும் கம்யூனிஸ்ட் இயக்கத்திற்கும் ஈடு செய்ய முடியாதது” என்று குறிப்பிட்டார். மேலும், அவருடைய குடும்பத்தினருக்கு ஆழ்ந்த அனுதாபத்தைத் தெரிவித்தார்.
தமிழ்நாடு முதலமைச்சர் மு.க. ஸ்டாலின், தனது இரங்கல் குறிப்பில் நல்லகண்ணுவை “சமரசமற்ற போராளி” எனப் போற்றினார். “எனக்கு ஒரு கண்ணில் சரிவரப் பார்வை இல்லை என்றாலும், அகத்தில் மற்றொரு கண் இருக்கிறது; அதுதான் நல்லகண்ணு” என்று மு. கருணாநிதி அவர்கள் ஒருகாலத்தில் குறிப்பிட்டதை நினைவுகூர்ந்தார். அடக்குமுறைச் சட்டங்களுக்கு எதிரான போராட்டங்களில் தோளோடு தோள் நின்று போராடிய தலைவராக நல்லகண்ணுவை அவர் பாராட்டினார். முழு அரசு மரியாதையுடன் இறுதிச்சடங்கு நடத்தப்பட வேண்டும் என்றும் தெரிவித்தார்.
மக்கள் நீதி மய்யம் தலைவர் கமல்ஹாசன், “தனக்கென்று ஒரு வாழ்க்கை என்ற சிந்தனையே இல்லாமல் பொதுநலத்துக்காக அனைத்தையும் அர்ப்பணித்தவர் நல்லகண்ணு. நேர்மை, எளிமை, தூய்மை ஆகியவற்றின் உருவகமாகத் திகழ்ந்தவர்” எனக் குறிப்பிட்டார். 80 ஆண்டுகளாக அயராது களத்தில் நின்ற போராளியின் சேவையை அவர் நினைவுகூர்ந்தார்.
நடிகர் ரஜினிகாந்த் தனது இரங்கல் செய்தியில், “மாறாத கொள்கைப் பிடிப்புடன் வாழ்ந்து மறைந்த நல்லகண்ணு அவர்களின் இழப்பு தமிழக மக்களுக்கு ஈடு செய்ய முடியாதது” என்று தெரிவித்துள்ளார். அவரது ஆத்மா சாந்தியடைய பிரார்த்திப்பதாகவும் கூறினார்.
அரசியல் கட்சிகளைத் தாண்டி அனைத்து தரப்பினரிடமும் மரியாதை பெற்ற தலைவர் என்ற அடையாளத்தை வாழ்நாளில் உருவாக்கியவர் நல்லகண்ணு. சிறை, சித்திரவதை, போராட்டங்கள்—எத்தனை சவால்கள் வந்தாலும் கொள்கை உறுதியை குலைக்காமல் நின்ற அவர், தமிழ்நாட்டின் அரசியல் வரலாற்றில் தனித்த கல்வெட்டாகத் திகழ்கிறார். அவரது வாழ்வும் பணியும் இனி வரும் தலைமுறைகளுக்கு வழிகாட்டும் ஒளியாகத் திகழும் என்பது பலரின் நம்பிக்கையாகும்.