MurungaiLeaf Bujji : முருங்கை கீரையில் பஜ்ஜி செய்யலாமா..? அது எப்படிங்க..?

நம் அனைவருக்கும் எளிதில் கிடைக்கக்கூடிய கீரைகளில் ஒன்று முருங்கை கீரை. பெரும்பாலானவர்கள் வீட்டில் இந்த கீரை காணப்படுகிறது. இந்த கீரை எளிதில் கிடைக்க கூடியது என்றாலும், இந்த கீரையில் அதிகப்படியான சத்துக்கள் உள்ளது.

முருங்கை கீரையில் வைட்டமின்கள், தாதுக்கள், இரும்பு, கால்சியம், வைட்டமின் ஏ மற்றும் நார்ச்சத்துகள் நிறைந்துள்ளன. இது உடல் ஆரோக்கியத்தை மேம்படுத்துவதோடு, பல்வேறு ஆரோக்கிய நன்மைகளை நமக்கு அளிக்கிறது. இப்படிப்பட்ட நன்மைகளை கொண்ட முருங்கை கீரையை வைத்து, வித்தியாசமான முறையில் பஜ்ஜி செய்வது எப்படி என்று பார்ப்போம்.

தேவையானவை 

• சோள மாவு – 1/2 கப்
• கடலை மாவு – 1/2 கப்
• மிளகாய் தூள் – 1 டீஸ்பூன்
• மஞ்சள் தூள் – 1/2 டீஸ்பூன்
• சீரக தூள் – 1/2 டீஸ்பூன்
• கரம் மசாலா தூள் – 1/2 டீஸ்பூன்
• முருங்கை கீரை – 5 கொத்து
• உப்பு -தேவையான அளவு

செய்முறை 

முதலில் தேவையான பொருட்களை தயாராக வைத்துக் கொள்ள வேண்டும். அதன் பின் சோள மாவு, கடலை மாவு, மிளகாய் தூள், மஞ்சள் தூள், சீரக தூள், கரம் மசாலா தூள் மற்றும் சிறிதளவு உப்பு சேர்த்து அதனுடன் தண்ணீர் சேர்த்து கலக்கி வைத்துக் கொள்ள வேண்டும். அதன் பின் நாம் வைத்துள்ள முருங்கைக்கீரை கொத்துக்களை சிறு சிறு இணுக்குகளாக தனியே பிரித்து வைத்துக் கொள்ள வேண்டும்.

பின் ஒரு கடாயில் எண்ணெய் ஊற்றி, எண்ணெய் கொதித்ததும் ஒவ்வொரு சிறு சிறு கொத்துக்களாக எடுத்து மாவில்  முக்கி கடாயில் போட்டு பொரித்து எடுக்க வேண்டும். இப்போது சுவையான முருங்கைக்கீரை பஜ்ஜி தயார்.

குழந்தைகள் ஸ்நாக்ஸ் கேக்கும் போது இதனை செய்து கொடுக்கலாம். கீரையை சாப்பிடுவதற்கு மறுக்கும் குழந்தைகள், இப்படி வித்தியாசமான முறையில் செய்து கொடுக்கும்போது விரும்பி சாப்பிடுவர்.