மயில்சாமி, எனக்கு நீண்டகால நண்பர்; நடிகர் ரஜினிகாந்த்.!

மறைந்த நகைச்சுவை நடிகர் மயில்சாமி உடலுக்கு, நடிகர் ரஜினிகாந்த் இறுதி மரியாதையை செலுத்தினார்.

மறைந்த பிரபல காமெடி நடிகரான மயில்சாமி உடலுக்கு திரைத்துறையினர் பலரும் அஞ்சலி செலுத்திவந்த நிலையில், இன்று நடிகர் ரஜினிகாந்த் தனது இறுதி அஞ்சலியை செலுத்திவிட்டு அவரது குடும்பத்திற்கு தனது ஆறுதலை தெரிவித்தார். உடல்நலக்குறைவு காரணமாக நேற்று அதிகாலை உயிரிழந்த 57 வயதான நகைச்சுவை நடிகர் மயில்சாமி, 200 படங்களுக்கு மேல் நடித்துள்ளார்.

வடிவேலு, விவேக் உள்ளிட்ட காமெடி நடிகர்களுடன் நடித்த மயில்சாமி, தனது தனித்திறமையுடன் தமிழ் சினிமாவில் அறியப்பட்டார். அஞ்சலி செலுத்திவிட்டு பேசிய ரஜினிகாந்த், மயில்சாமி எனது நீண்டகால நண்பர். சிவனின் மிகப்பெரும் பக்தரான அவரை, சிவராத்திரி அன்று சிவன் அழைத்துக்கொண்டார்.

மயில்சாமி தனது கடைசி ஆசையாக, சிவனுக்கு ரஜினி பாலபிஷேகம் செய்யவேண்டும் என சிவராத்திரியன்று இசைக்கலைஞர் சிவமணியிடம் தெரிவித்திருப்பதாக, செய்தியாளர்கள் கேட்ட கேள்விக்கு, மயில்சாமியின் கடைசி ஆசையை தான் நிறைவேற்றி வைப்பதாகவும் ரஜினிகாந்த் கூறியுள்ளார்.