டெல்லி : இந்திய இருசக்கர வாகனச் சந்தையைப் பொறுத்தவரை, பண்டிகைக் காலம் தொடங்குவதற்கு முன்னதாக 2026-ஆம் ஆண்டு ஆகஸ்ட் மாதம் மிகவும் பரபரப்பான மற்றும் முக்கியமான மாதமாக மாறப்போகிறது. ஸ்போர்ட்ஸ் பைக்குகள், நவீன எலக்ட்ரிக் ஸ்கூட்டர்கள் மற்றும் வழக்கமான கம்யூட்டர் பைக்குகளை எதிர்பார்த்துக் காத்திருக்கும் வாடிக்கையாளர்களுக்காகப் பல்வேறு முன்னணி நிறுவனங்கள் புதிய மாடல்களைக் களமிறக்கத் தயாராகி வருகின்றன. அந்த வகையில், இந்த மாதத்தில் அதிகம் எதிர்பார்க்கப்படும் மூன்று முக்கிய வாகனங்களின் அறிமுக விவரங்கள் இதோ:
யமகா YZF R2
யமகா மோட்டார் நிறுவனம் தனது புகழ்பெற்ற R15 மற்றும் பெரிய சூப்பர்ஸ்போர்ட் மாடல்களுக்கு இடைப்பட்ட இடைவெளியı நிரப்பும் வகையில், புதிய யமகா YZF R2 பைக்கை வரும் ஆகஸ்ட் 27-ஆம் தேதி அறிமுகப்படுத்தத் திட்டமிட்டுள்ளது. R15 வரிசைக்கு அடுத்தபடியாக வரவுள்ள இந்த புதிய 200சிசி ஸ்போர்ட்ஸ் பைக் மீதான எதிர்பார்ப்பு இளைஞர்கள் மத்தியில் மிகவும் அதிகமாக உள்ளது.
இந்த பைக்கில் 200சிசி லிக்யூடு-கூல்டு சிங்கிள்-சிலிண்டர் இன்ஜின் மற்றும் 6-ஸ்பீடு கியர்பாக்ஸ் கொடுக்கப்படலாம். பல்வேறு இன்ஜின் வேகங்களிலும் சிறந்த செயல்திறனை வழங்க 'விவிஏ' (VVA) தொழில்நுட்பமும் இடம்பெறக்கூடும். இது தோராயமாக 24bhp பவரையும், 20Nm டார்க் திறனையும் வெளிப்படுத்தும் என எதிர்பார்க்கப்படுகிறது.
மேலும், புளூடூத் இணைப்பு, நேவிகேஷன் ஆதரவு மற்றும் ஸ்மார்ட்போன் அலெர்ட்டுகளுடன் கூடிய டிஎஃப்ட் டிஸ்ப்ளே இதில் வழங்கப்படும். உயர் ரக வேரியன்ட்களில் ரைடிங் மோடுகள், டிராக்ஷன் கன்ட்ரோல் மற்றும் குவிக்ஷிஃப்டர் போன்ற நவீன அம்சங்கள் இடம்பெறும். தினசரி பயன்பாட்டிற்கும் நெடுஞ்சாலைப் பயணங்களுக்கும் கைகொடுக்கும் வகையில் வடிவமைக்கப்பட்டுள்ள இப்பைக் தோராயமாக லிட்டருக்கு 35 முதல் 40 கி.மீ வரை மைலேஜ் வழங்கும் என எதிர்பார்க்கப்படுகிறது. இதன் எக்ஸ்-ஷோரூம் விலை சுமார் ரூ. 2.15 லட்சம் வரை இருக்கலாம் என மதிப்பிடப்பட்டுள்ளது.
ஏத்தர் EL01
பெங்களூரில் நடைபெறவுள்ள தனது கம்யூனிட்டி டே நிகழ்வின் போது, ஏத்தர் எனர்ஜி நிறுவனம் தனது புதிய EL01 எலக்ட்ரிக் ஸ்கூட்டரை வரும் ஆகஸ்ட் 29-ஆம் தேதி அறிமுகப்படுத்தவுள்ளது. எதிர்காலத் தயாரிப்புகளுக்காகப் பிரத்யேகமாக உருவாக்கப்பட்டுள்ள ஏத்தரின் புதிய 'EL' பிளாட்ஃபார்மை அடிப்படையாகக் கொண்டு வெளிவரும் முதல் மாடல் இதுவாகும்.
இந்த எலக்ட்ரிக் ஸ்கூட்டர் ஒருமுறை முழுமையாகச் சார்ஜ் செய்தால் சுமார் 120 கி.மீ தூரம் வரை பயணிக்கும் நம்பகமான ரேஞ்சை வழங்கும் என்று எதிர்பார்க்கப்படுகிறது. இதில் 4kW ஹப் மோட்டார், முன்பக்கத்தில் டிஸ்க் பிரேக், பின் பக்கத்தில் டிரம் பிரேக், அலாய் வீல்கள் மற்றும் tubeless டயர்கள் வழங்கப்படலாம். மேம்பட்ட மென்பொருள், நவீன கனெக்டெட் அம்சங்கள், அதிக சேமிப்பு இடம் மற்றும் அன்றாடப் பயன்பாட்டிற்கு ஏற்ற எளிய நடைமுறைப் பயன்பாட்டிற்கு இந்த புதிய பிளாட்ஃபார்ம் முக்கியத்துவம் அளிக்கிறது. இதன் தொடக்க விலை சுமார் ரூ. 99,000 (எக்ஸ்-ஷோரூம்) அளவில் நிர்ணயிக்கப்படலாம் என எதிர்பார்க்கப்படுகிறது.
பஜாஜ் பல்சர் 150
பஜாஜ் ஆட்டோ நிறுவனம் தனது புகழ்பெற்ற 'பல்சர்' பிராண்டின் 25-வது ஆண்டு நிறைவைக் கொண்டாடும் விதமாக, புதிய தலைமுறை பஜாஜ் பல்சர் 150 பைக்கை வரும் ஆகஸ்ட் 12-ஆம் தேதி அறிமுகப்படுத்தத் தயாராகி வருகிறது. பல ஆண்டுகளாகச் சந்தையில் மிகப்பெரிய வெற்றியைப் பெற்றுள்ள இந்த பைக், தற்போது முற்றிலும் புதிய தோற்றத்துடனும் மாற்றங்களுடனும்களம் இறங்குகிறது.
எளிய வடிவமைப்பு மாற்றத்தைத் தாண்டி, புதிய சேஸ் மற்றும் அதிநவீன இன்ஜின் மாற்றங்களுடன் இந்த பைக் வெளிவருகிறது. இன்ஜின் அதிர்வுகளைக் குறைத்து, நீண்ட தூரப் பயணங்களை மிகவும் வசதியானதாக மாற்ற நிறுவனம் திட்டமிட்டுள்ளது. மேலும், தற்போதைய இரட்டைப் பின்புற ஷாக் அப்சார்பர்களுக்குப் பதிலாக 'மோனோஷாக்' செட்டப் வழங்கப்படலாம் என்பதால், இதன் ஹேண்ட்லிங் மற்றும் ரைடு தரம் மிகச்சிறப்பாக இருக்கும்.
150சிசி அளவில் இருக்கும் இந்த இன்ஜின், புதிய உமிழ்வு தரநிலைகளுக்கு ஏற்ப மேம்படுத்தப்பட்டு அதிக பரிபூரணத்துடன் வெளிவரும். பொதுமக்களும் எளிய நடுத்தர வர்க்கத்தினரும் அதிகம் எதிர்பார்க்கும் எரிபொருள் திறனைப் பொறுத்தவரை, இப்பைக் லிட்டருக்குத் தோராயமாக 45 முதல் 50 கி.மீ வரை மைலேஜ் வழங்கும் திறன் கொண்டதாக வடிவமைக்கப்பட்டுள்ளது.