டெல்லி : தென் ஆப்பிரிக்காவின் அதிரடி பேட்ஸ்மேன் ஹென்ரிச் கிளாசென், கிரிக்கெட்டின் எதிர்காலம் குறித்து முக்கியமான கருத்தை வெளியிட்டுள்ளார். தற்போதைய சூழலில் கிரிக்கெட் விளையாட்டு வேகமாக டி20 வடிவத்தை மையமாகக் கொண்டு நகர்ந்து கொண்டிருப்பதாக அவர் தெரிவித்துள்ளார். ரசிகர்கள் விரும்பும் அதிரடி மற்றும் குறைந்த நேரத்தில் போட்டி என்ற அம்சங்களால் T20 கிரிக்கெட் உலகம் முழுவதும் அதிக வரவேற்பைப் பெற்றுள்ளது என்றும் அவர் கூறினார்.
இதன் விளைவாக, இந்தியன் பிரீமியர் லீக் போன்ற ஃபிரான்சைஸ் லீக்குகள் வேகமாக வளர்ச்சி அடைந்து, உலகம் முழுவதும் உள்ள வீரர்களை ஈர்த்து வருகின்றன. இன்றைய சர்வதேச கிரிக்கெட் வீரர்கள் போட்டிகளை மட்டுமே நம்பாமல், பல்வேறு லீக்குகளில் விளையாடி தங்கள் வாழ்க்கையை திட்டமிட்டு அமைத்துக் கொள்கிறார்கள் என்றும் கிளாசென் குறிப்பிட்டார்.
சில சமயங்களில் சர்வதேச கிரிக்கெட் அளிக்கும் வருமானம் போதுமானதாக இருக்காது; ஆனால் ஃபிரான்சைஸ் லீக்குகள் அதிக வருமானம் வழங்குவதால், வீரர்கள் அந்த திசையை நோக்கி நகர்வது இயல்பான ஒன்றாக மாறியுள்ளது என்றும் அவர் விளக்கினார்.
அதேசமயம், உலகம் முழுவதும் T20 கிரிக்கெட் மட்டும் நடைபெறும் நிலை உடனடியாக உருவாகாது என்றும் அவர் தெரிவித்தார். சர்வதேச கிரிக்கெட் கவுன்சில் (ஐசிசி) மற்றும் இந்திய கிரிக்கெட் கட்டுப்பாட்டு வாரியம் (பிசிசிஐ) போன்ற வலுவான நிர்வாக அமைப்புகள் வரை டெஸ்ட் மற்றும் ஒருநாள் கிரிக்கெட் தொடரும் என்றும் அவர் கூறினார். இந்தியா, இங்கிலாந்து, ஆஸ்திரேலியா போன்ற நாடுகள் டெஸ்ட் கிரிக்கெட்டின் பாரம்பரியத்தை பாதுகாக்கும் நிலையில் உள்ளன என்றும் அவர் சுட்டிக்காட்டினார்.
மேலும், எதிர்காலத்தில் T20 கிரிக்கெட் நீண்ட காலம் நிலைத்திருக்கும் முக்கியமான வடிவமாக இருக்கும் என்றும், டெஸ்ட் மற்றும் ஒருநாள் போட்டிகள் குறைந்த அளவில் அல்லது வரையறுக்கப்பட்ட வடிவத்தில் மட்டுமே நடைபெறும் வாய்ப்பு உள்ளது என்றும் கிளாசென் கணித்தார்.
தற்போது ஐபிஎல் 2026 தொடரில் சன்ரைசர்ஸ் ஹைதராபாத் அணிக்காக விளையாடும் கிளாசென், 9 போட்டிகளில் 414 ரன்கள் குவித்து ஆரஞ்சு தொப்பி பட்டியலில் இரண்டாவது இடத்தில் உள்ளார்.