டெல்லி : இன்றைய காலக்கட்டத்தில் பெட்ரோல் விலை நாள்தோறும் உயர்ந்து கொண்டே செல்வது நடுத்தரக் குடும்பங்கள் மற்றும் தினசரி வேலைக்குச் செல்வோருக்குப் பெரும் சுமையாக மாறியுள்ளது. இதனால் புதிய பைக் வாங்கும் எவரொருவரின் மனதிலும் முதலில் எழும் கேள்வி, "இந்த வண்டி எவ்வளவு மைலேஜ் தரும்?" என்பதுதான்.
வாகனத் தயாரிப்பு நிறுவனங்கள் ஒரு குறிப்பிட்ட மைலேஜைக் கூறினாலும், அரசின் ARAI (Automotive Research Association of India) அமைப்பு மற்றும் நிஜ உலகப் பயன்பாட்டின் (Real-world usage) அடிப்படையில் இந்தியாவில் மிகச்சிறந்த மைலேஜை வழங்கக்கூடிய டாப் 3 பைக்குகள் எவை என்பதைப் பற்றி இந்த செய்தியில் விரிவாக பார்ப்போம்.
டிவிஎஸ் ஸ்போர்ட் (TVS Sport) - மைலேஜ் சாம்பியன்
மைலேஜ் என்று வந்துவிட்டாலே இந்திய இருசக்கர வாகனச் சந்தையில் அசைக்க முடியாத முதலிடத்தில் இருப்பது டிவிஎஸ் ஸ்போர்ட் பைக்காகும். இதன் குறைந்த எடையும், மிக எளிமையான வடிவமைப்புமே இதன் மிகப்பெரிய பலமாக விளங்குகிறது.
வாகனத் தயாரிப்பு நிறுவனத்தின் தகவல்களின் படி, இதன் ARAI மைலேஜ் தோராயமாக 70 முதல் 80 கி.மீ வரை உள்ள நிலையில், நிஜ உலகப் பயன்பாட்டில் இது எளிதாக 65 முதல் 68 கி.மீ வரை மைலேஜ் வழங்குகிறது. இதில் 109.7 சிசி இன்ஜின் பொருத்தப்பட்டுள்ளது. இதன் சிறப்பம்சமாக, இதில் பயன்படுத்தப்பட்டுள்ள 'Ecothrust Fuel Injection (ET-Fi)' தொழில்நுட்பம் பெட்ரோல் வீணாவதைத் தடுத்து, இன்ஜினுக்குத் தேவையான எரிபொருளை மட்டும் துல்லியமாக அனுப்புகிறது. இதன் காரணமாக நீண்ட தூரப் பயணங்களை மேற்கொள்வோரால் கணிசமான அளவு பெட்ரோல் செலவைக் குறைக்க முடிகிறது.
பஜாஜ் பிளாட்டினா 100 (Bajaj Platina 100)
குறைந்த விலையில் அதிக மைலேஜை வழங்குவதோடு மட்டுமல்லாமல், மிகச் சொகுசான பயண அனுபவத்தையும் விரும்புபவர்களின் முதல் தேர்வாகப் பஜாஜ் பிளாட்டினா 100 திகழ்கிறது. இந்நிறுவனம் இதன் மைலேஜ் அளவை தோராயமாக 72 முதல் 75 கி.மீ வரை என்று குறிப்பிடுகிறது.நிஜ உலகச் சாலைகளில் இது 63 முதல் 68 கி.மீ வரை மைலேஜ் தருகிறது.
102 சிசி இன்ஜின் திறன் கொண்ட இப்படத்தில், 'Comfortec' சஸ்பென்ஷன் தொழில்நுட்பம் சிறப்பான முறையில் வடிவமைக்கப்பட்டுள்ளது. தமிழ்நாட்டின் குண்டும் குழியுமான கிராமப்புறச் சாலைகளில் அல்லது மேடு பள்ளமான பாதைகளில் பயணம் செய்யும்போது கூட, இது உடலுக்கு அதிகப்படியான அதிர்வைத் தராமல் மிக மென்மையாக அழைத்துச் செல்லும். குறிப்பாக, தினமும் அதிக தூரம் பயணம் செய்பவர்களுக்கும், சுமைகளைத் தூக்கிச் செல்வோருக்கும் இது மிகவும் உகந்த வாகனமாகும்.
ஹீரோ ஸ்பிளெண்டர் பிளஸ் (Hero Splendor Plus)
பல ஆண்டுகளாக இந்திய மக்களின் பேராதரவைப் பெற்று, விற்பனையில் அசைக்க முடியாத சாம்ராஜ்யத்தை நடத்திவரும் பைக் ஹீரோ ஸ்பிளெண்டர் பிளஸ் ஆகும். இதன் எளிமையான பராமரிப்புச் செலவு மற்றும் நீண்ட கால உழைப்பு (Durability) ஆகியவை இதற்கு மக்களிடையே மிகப்பெரிய நற்பெயரைப் பெற்றுத் தந்துள்ளன. இதன் ARAI மைலேஜ் 70 முதல் 73 கி.மீ வரை குறிப்பிடப்படும் நிலையில், நிஜ உலகப் பயன்பாட்டில் இது 60 முதல் 65 கி.மீ வரை மைலேஜ் வழங்குகிறது.
97.2 சிசி இன்ஜின் கொண்ட இதில், 'i3S' (Idle Start-Stop System) எனப்படும் நவீன தொழில்நுட்பம் கொடுக்கப்பட்டுள்ளது. கடுமையான நகர டிராஃபிக் சிக்னல்களில் வண்டி நிற்குமபொழுது இந்தத் தொழில்நுட்பம் இன்ஜினைக் தானாகவே அணைத்துவிடும். மீண்டும் நாம் கிளட்சைப் பிடிக்கும்போது இன்ஜின் தானாகவே ஸ்டார்ட் ஆகிவிடும். இதன் மூலம் நகரங்களின் நெரிசல்களில் வீணாகும் பெட்ரோல் பெருமளவு மிச்சப்படுத்தப்படுகிறது. மேலும், சந்தையில் இதன் ரீசேல் மதிப்பு (Resale value) மிக அதிகமாக இருப்பது இதன் தனிச்சிறப்பாகும்.
விலை விவரம்
- டிவிஎஸ் ஸ்போர்ட் (TVS Sport): இதன் எக்ஸ்-ஷோரூம் விலை தோராயமாக ரூ. 58,750 முதல் ரூ. 59,950 வரை தொடங்குகிறது. (இந்தியச் சந்தையில் மிகக் குறைந்த விலையில் கிடைக்கும் முன்னணி மைலேஜ் பைக்குகளில் இதுவும் ஒன்றாகும்).
- பஜாஜ் பிளாட்டினா 100 (Bajaj Platina 100): இதன் எக்ஸ்-ஷோரூம் விலை தோராயமாக ரூ. 72,942 அளவில் விற்பனை செய்யப்பட்டு வருகிறது.
- ஹீரோ ஸ்பிளெண்டர் பிளஸ் (Hero Splendor Plus): இதன் எக்ஸ்-ஷோரூம் விலை மாறுபாடுகளுக்கு ஏற்ப தோராயமாக ரூ. 76,946 முதல் ரூ. 79,677 வரை நிர்ணயிக்கப்பட்டுள்ளது.
உங்களுக்கு எந்த பைக் பொருத்தமானது?
உங்கள் சொந்தத் தேவை மற்றும் பயன்பாட்டிற்கேற்ப சரியான பைக்கைத் தேர்ந்தெடுப்பது அவசியமாகும். லேசான எடையில் அதிகப்படியான மைலேஜ் மட்டும் உங்களது முதன்மையான இலக்காக இருந்தால், நீங்கள் தாராளமாக டிவிஎஸ் ஸ்போர்ட் பைக்கைத் தேர்ந்தெடுக்கலாம்.
கரடுமுரடான சாலைகளில் தினமும் நீண்ட தூரம் முதுகுவலியின்றி சொகுசாகப் பயணிக்க வேண்டும் என்று விரும்பினால் பஜாஜ் பிளாட்டினா 100 சிறந்த தேர்வாக இருக்கும்.
வண்டியின் ஆயுள்காலம் பல ஆண்டுகளுக்குத் தடையின்றி நீடிக்க வேண்டும், எதிர்காலத்தில் எப்போது விற்றாலும் நல்ல விலை கிடைக்க வேண்டும் என்று கருதினால், எந்தவித யோசனையும் இன்றி ஹீரோ ஸ்பிளெண்டர் பிளஸ் பைக்கைக் தேர்வு செய்யலாம். நீங்கள் வண்டியைச் சரியான வேகத்தில் சீராக இயக்கி, குறிப்பிட்ட கால இடைவெளியில் முறையான சர்வீஸ் செய்து வந்தால், நிறுவனங்கள் குறிப்பிடும் மைலேஜிற்கு மிக நெருக்கமான பலனை உங்களால் எளிதில் பெற முடியும் என்பதும் குறிப்பிடத்தக்கது.