தமிழகத்தில் குறையுமா கடும் வெயில்? வெதர்மேன் ஹேமச்சந்தர் கொடுத்த அப்டேட்!

சென்னை : கடந்த சில நாட்களாகத் தமிழகம் முழுவதும் சுட்டெரிக்கும் வெயில் மற்றும் வறண்ட வானிலை நிலவி வருகிறது. வடக்கு வங்கக்கடலில் நிலைகொண்டிருந்த குறைந்த காற்றழுத்த தாழ்வு பகுதி தற்போது வடக்கு ஒடிசா கடற்கரையை நோக்கி நகர்ந்துள்ளது.

இது அடுத்த 24 மணி நேரத்திற்குள் ஒடிசா நிலப்பகுதியின் மேல் தீவிரமடைந்து, ஒரு "நன்கு வரையறுக்கப்பட்ட குறைந்த காற்றழுத்த தாழ்வுப் பகுதியாக" (Well-marked Low Pressure Area) மாற வாய்ப்புள்ளதாக வானிலை ஆர்வலர் ஆர். ஹேமச்சந்தர் தெரிவித்துள்ளார்.

ஒடிசாவிற்கு அருகில் இந்தக் காற்றழுத்த தாழ்வு பகுதி நிலைத்திருந்தாலும், இது தென்னிந்தியாவில் தென்மேற்குப் பருவமழை வலுப்பெறுவதற்குத் தேவையான சாதகமான சூழலை உருவாக்காது. இருப்பினும், வளிமண்டல சுழற்சி மற்றும் காற்றழுத்த மாற்றங்களின் காரணமாக, தமிழகத்தில் நிலவும் வெப்பத்தின் தீவிரத்தில் மாற்றம் ஏற்படக்கூடும்.

இன்று மற்றும் நாளை: தமிழகம் மற்றும் புதுச்சேரியில் தற்போதைய சூழல் தொடரும். வறண்ட வானிலையுடனும், வெப்பமான சூழலும் நீடிக்கும். நாளை முதல் வெயிலின் தாக்கம் படிப்படியாகக் குறையத் தொடங்கும் என்று எதிர்பார்க்கப்படுகிறது.தமிழக மக்கள் அடுத்த சில நாட்களுக்கு வெயிலின் தாக்கத்தில் இருந்து நிவாரணம் பெற வாய்ப்புள்ளதால், குறிப்பாக மதிய நேரங்களில் கூடுதல் முன்னெச்சரிக்கையுடன் இருக்குமாறு அறிவுறுத்தப்படுகிறது.