சென்னை : விடுதலைச் சிறுத்தைகள் கட்சியின் விருது வழங்கும் விழாவில் பேசிய அக்கட்சியின் தலைவர் தொல். திருமாவளவன், தற்போதைய அரசியல் சூழல் மற்றும் திமுக கூட்டணியிலிருந்து விசிக விலகல் குறித்த சர்ச்சைகளுக்குத் தெளிவான விளக்கத்தை அளித்துள்ளார்.
விழாவில் பேசிய திருமாவளவன், "திமுக தலைமையிலான கூட்டணியில் விசிக இல்லை என்பதை அக்கட்சியின் தலைமையே அறிவித்துவிட்டது. அந்த முடிவை நான் எடுக்கவில்லை. அதேசமயம், அமைச்சரவையில் நாங்கள் நீடிக்கிறோம், கூட்டணிப் பேச்சுவார்த்தையிலும் பங்கேற்றோம். ஆனால், விசிக-விடம் உறவு இல்லை என்று திமுக தலைமை அறிவித்தது. ஒருவேளை தவெக (தமிழக வெற்றிக் கழகம்) தலைமையில் புதிய கூட்டணி அமைந்தால், அதில் விசிக இடம்பெறும் என்பதில் எங்களுக்கு எவ்வித ஐயமும் இல்லை," என்று அதிரடியாகத் தெரிவித்துள்ளார்.
தனது தனிப்பட்ட பண்பு மற்றும் அரசியல் அணுகுமுறை குறித்துப் பேசிய அவர், "அரசியல் என்பது கொள்கை சார்ந்தது, தனிப்பட்ட நட்பு என்பது வேறானது. நான் பாஜக தலைவர்களான தமிழிசை சௌந்தரராஜன், பொன். ராதாகிருஷ்ணன், அண்ணாமலை ஆகியோரைச் சந்திக்கும்போதெல்லாம் தேடிச் சென்று வணக்கம் சொல்லக்கூடியவன்.
வைகோ அல்லது அன்புமணி ராமதாஸாக இருந்தாலும், வண்டியை நிறுத்தி அவர்களை நலம் விசாரிப்பது என் இரத்தத்தில் ஊறிய பண்பு. இதைத் தாய் தந்தையரிடம் இருந்து பெற்றுள்ளேன். இந்தத் தனிமனித நட்பை, அரசியல் பகைமையோடு போட்டு குழப்பிக் கொள்ளக் கூடாது," என்று குறிப்பிட்டுள்ளார்.
டெல்லியில் உள்ள அரசியல் பண்பாடு குறித்துத் தனது அனுபவத்தைப் பகிர்ந்து கொண்ட திருமாவளவன், "காங்கிரஸ் மற்றும் பாஜக தலைவர்கள் நாடாளுமன்றத்தில் கடுமையான கருத்து மோதல்களில் ஈடுபடுவார்கள். ஆனால், வெளியே வந்ததும் தோளில் கை போட்டுக்கொண்டு தோழமையுடன் விவாதிப்பார்கள். வாஜ்பாய் அல்லது மோடி பார்த்துவிடுவார்கள் என்று யாரும் பயப்படுவதில்லை. ஆனால், இந்தக் கூட்டணியில் இருப்பவர் அந்தக் கூட்டணியில் இருப்பவர்களுடன் பேசக்கூடாது என்ற குறுகிய மனப்பான்மை தமிழகத்தில் மட்டுமே நிலவுகிறது," என்று வருத்தத்துடன் தெரிவித்தார்.