குட் நியூஸ்! மீண்டும் குறைந்த தங்கம் விலை!

சென்னை : தங்கத்தின் விலையில் கடந்த சில நாட்களாக நிலவி வந்த ஏற்ற இறக்கங்கள், நகைப்பிரியர்களைத் தொடர்ந்து குழப்பத்திலும் எதிர்பார்ப்பிலும் வைத்திருக்கிறது. ஜூலை 13-ஆம் தேதி ஒரு கிராம் தங்கம் ரூ. 13,200 மற்றும் ஒரு சவரன் ரூ. 1,05,600 என விற்பனையானது.

அதனைத் தொடர்ந்து ஜூலை 14-ஆம் தேதி கிராமுக்கு ரூ. 50 மற்றும் சவரனுக்கு ரூ. 400 என சரிந்து, முறையே ரூ. 13,150 மற்றும் ரூ. 1,05,200-க்கு விற்பனை செய்யப்பட்டது. இந்தச் சரிவு நகை வாங்கத் திட்டமிட்டிருந்தவர்களுக்கு ஒரு சிறு ஆறுதலை அளித்தது. இருப்பினும், இந்த விலை மாற்றங்கள் நிலையற்றதாகவே இருந்து வருகின்றன.

நேற்று (ஜூலை 15), குறையத் தொடங்கியிருந்த தங்கத்தின் விலை திடீரென உயர்ந்து, ஒரு கிராம் ரூ. 13,180 மற்றும் சவரன் ரூ. 1,05,440-ஆக விற்பனையானது. இந்த உயர்வு நகை வாங்குவோர் மத்தியில் சலசலப்பை ஏற்படுத்திய நிலையில், இன்று (ஜூலை 16) மீண்டும் தங்கம் விலையில் மாற்றங்கள் காணப்படுகின்றன. இன்றைய நிலவரப்படி, நேற்று உயர்ந்து காணப்பட்ட தங்கம் விலை, மீண்டும் கிராமுக்கு ரூ. 30 குறைந்து ரூ. 13,150-க்கும், சவரனுக்கு ரூ. 240 குறைந்து ரூ. 1,05,200-க்கும் விற்பனை செய்யப்படுகிறது.

அதே வேளையில், வெள்ளி விலையில் எந்த மாற்றமும் இன்றி, ஒரு கிராம் ரூ. 240 மற்றும் ஒரு கிலோ பார் வெள்ளி ரூ. 2,40,000 என நேற்று நிர்ணயிக்கப்பட்ட விலையிலேயே விற்பனையாகி வருகிறது. சர்வதேசச் சந்தை நிலவரங்கள் மற்றும் தேவைக்கேற்ப தங்கம் மற்றும் வெள்ளி விலையில் ஏற்படும் இத்தகைய தொடர் மாற்றங்கள், நகை முதலீட்டாளர்களையும் இல்லத்தரசிகளையும் தொடர்ந்து உற்றுநோக்கச் செய்துள்ளது.