ஜெர்மனிக்கு இது 'பிளாக் டே'! கால்பந்து ஜாம்பவானை வீழ்த்தி பராகுவே நிகழ்த்திய மிரட்டல் வெற்றி!

ஜெர்மனி : உலகக்கோப்பை கால்பந்து வரலாற்றில் 4 முறை சாம்பியன் பட்டம் வென்ற பலம் வாய்ந்த ஜெர்மனி அணி, 2026 பிஃபா (FIFA) உலகக்கோப்பை தொடரின் விறுவிறுப்பான 'ரவுண்ட் ஆப் 32' (Round of 32) நாக்அவுட் சுற்றில் பராகுவே (Paraguay) அணியிடம் அதிர்ச்சித் தோல்வி அடைந்து நடப்பு தொடரில் இருந்து வெளியேறியுள்ளது. ஆட்டத்தின் நிர்ணயிக்கப்பட்ட மற்றும் கூடுதல் நேர முடிவில் இரு அணிகளும் 1-1 என்ற கணக்கில் சமநிலை வகித்ததால், வெற்றியாளரைத் தீர்மானிக்க நடத்தப்பட்ட பெனால்டி ஷூட்-அவுட் (Penalty Shootout) முறையில் பராகுவே அணி ஜெர்மனியை வீழ்த்தி அடுத்த சுற்றுக்குத் தகுதி பெற்று மாபெரும் சாதனை படைத்துள்ளது.

கடந்த 2014-ல் கடைசியாகக் கோப்பை வென்ற ஜெர்மனி அணி, 2018 மற்றும் 2022 உலகக்கோப்பை தொடர்களில் குரூப் சுற்றோடு வெளியேறிய நிலையில், இந்த முறையும் நாக்அவுட் சுற்றின் தொடக்கத்திலேயே வெளியேறியிருப்பது உலகெங்கும் உள்ள அதன் ரசிகர்களைப் பேரதிர்ச்சியில் ஆழ்த்தியுள்ளது.

ஆட்டத்தின் முதல் பாதியில் பராகுவே அணியின் ஜூலியோ என்சிசோ (Julio Enciso) ஒரு பிரமாதமான ஹெட்டர் மூலம் கோல் அடித்து தனது அணிக்கு அதிர்ச்சி முன்னிலையைத் தேடித்தந்தார். தொடர்ந்து நடைபெற்ற இரண்டாம் பாதியின் 54-ஆவது நிமிடத்தில் ஜெர்மனியின் நட்சத்திர வீரர் காய் ஹாபெர்ட்ஸ் (Kai Havertz) ஒரு அபார கோல் அடித்து ஆட்டத்தை 1-1 எனச் சமன் செய்தார். கூடுதல் நேரத்தின் 112-ஆவது நிமிடத்தில் ஜெர்மனி அணி அடித்த மற்றொரு கோல், 'VAR' பரிசீலனைக்குப் பிறகு நடுவரால் ரத்து செய்யப்பட்டதால் மைதானத்தில் பெரும் பரபரப்பு ஏற்பட்டது.

இறுதியில் ஆட்டம் பெனால்டி ஷூட்-அவுட்டை நோக்கி நகர்ந்த போது, பராகுவே அணியின் கோல்கீப்பர் கில் (Gill) ஆட்டத்தின் நாயகனாக உருவெடுத்தார். ஜெர்மனியின் காய் ஹாபெர்ட்ஸ் மற்றும் நிக் வோல்டமேடே ஆகியோரின் பெனால்டி வாய்ப்புகளைத் தடுத்து நிறுத்தி அவர் பராகுவே அணிக்கு அசாத்திய முன்னிலையைத் தந்தார்.

சடன் டெத் (Sudden Death) வரை சென்ற இந்த த்ரில் ஷூட்-அவுட்டில் ஜெர்மனியின் ஜொனாதன் தா அடித்த பந்து கிராஸ்பாருக்கு மேல் செல்ல, பராகுவே வீரர் ஜோஸ் கனாலே மிக நேர்த்தியாகக் கோல் அடித்து தங்களது வரலாற்று வெற்றியை உறுதி செய்தார்.

ஜெர்மனியை வீழ்த்திய இந்த வரலாற்றுச் சிறப்புமிக்க வெற்றியைத் தொடர்ந்து, பராகுவே நாட்டின் அதிபர் சாண்டியாகோ பென்யா ஜூன் 30-ஆம் தேதியான இன்று அந்நாட்டில் 'தேசிய விடுமுறை' (National Holiday) அறிவித்து அதிகாரப்பூர்வ அரசாணை வெளியிட்டுள்ளார். வெற்றிக்கொடி நாட்டியுள்ள பராகுவே அணி, அடுத்ததாக வரும் சனிக்கிழமை பிலடெல்பியா நகரில் நடைபெறவுள்ள காலின் சுற்றில் பிரான்ஸ் அல்லது ஸ்வீடன் அணியை எதிர்கொள்ளவுள்ளது.