கரூர் மாவட்ட ஊராட்சி மன்ற துணை தலைவர் தேர்தலுக்கு தடை விதிக்க வேண்டும் என மதுரை உயர்நீதிமன்றத்தில் அதிமுக வேட்பாளர் சார்பில் மனு கொடுக்கப்பட்டுள்ளது.
கரூர் மாவட்ட ஊராட்சி குழு துணைத்தலைவர் பதவிக்கு போட்டியிடும் அதிமுக வேட்பாளர் திருவிக என்பவரை அழைத்துக்கொண்டு, முன்னாள் அதிமுக அமைச்சர் எம்.ஆர்.விஜயபாஸ்கர் இன்று திண்டுக்கல் மாவட்டம் வேடசந்தூர் அருகே கரூர் தேசிய நெடுஞ்சாலையில் வந்துகொண்டிருந்தார்.
அப்போது காரில் வந்த சிலர் முன்னாள் அமைச்சர் காரை வழிமறித்து கார் கண்ணாடியை உடைத்துள்ளனர். மேலும், அதிமுக வேட்பாளரை கடத்தி சென்றுள்ளதாகவும் புகார் அளிக்கப்பட்டது.
இதன் காரணமாக கரூரில், திமுக – அதிமுகவினர் இடையே மோதல் போக்கு உருவாகியுள்ளது. இதனை தடுக்க கரூரில் போலீசார் குவிக்கப்பட்டுள்ளனர்.
தற்போது, அதிமுக வேட்பாளர் கடத்தப்பட்டதால், துணை தலைவர் தேர்தலுக்கு தற்போது தடை விதிக்க வேண்டும் என மதுரை உயர்நீதிமன்றத்தில் அதிமுக வேட்பாளர் சார்பில் மனு கொடுக்கப்பட்டுள்ளது.
