ஐபிஎல் தொடரில் ராஜஸ்தான் அணிக்கு எதிரான இன்றைய போட்டியில் சென்னை அணியின் அதிரடி பேட்ஸ்மேன் மொயின் அலி, 19 பந்துகளில் அரைசதம் விளாசி அசத்தினார்.
ஐபிஎல் தொடர் விறுவிறுப்பாக நடைபெற்று வரும் நிலையில், இன்று நடைபெறும் 68-வது போட்டியில் சென்னை சூப்பர் கிங்ஸ் – ராஜஸ்தான் ராயல்ஸ் அணிகள் மோதி வருகிறது. மும்பை ப்ரபோர்ன் மைதானத்தில் நடைபெற்று வரும் இந்த போட்டியில் டாஸ் வென்ற சென்னை அணி, பேட்டிங்கை தேர்வு செய்ய, அதன்படி தொடக்க ஆட்டக்காரர்களாக ருதுராஜ் கெய்க்வாட் – டெவன் கான்வே களமிறங்கினார்கள். இதில் 2 ரன்கள் எடுத்து ருதுராஜ் தனது விக்கெட்டை இழக்க, அவரைதொடர்ந்து மொயின் அலி களமிறங்கினார்.
தொடக்கம் முதலே மொயின் அலி அதிரடியாக அடிவர, 5-வது ஓவரை ட்ரெண்ட் போல்ட் வீசினார். இந்த ஓவரின் முதல் பந்திலே மொயின் அலி, சிக்ஸர் அடித்து அசத்தினார். அதனைதொடர்ந்து இந்த ஓவரின் அனைத்து பந்துகளையும் 4 ரன்கள் அடித்து 6-4-4-4-4-4 என்ற கணக்கில் 26 ரன்கள் விளாசி, 19 பந்துகளுக்கு 51 ரன்கள் அடித்து அதிவேகமாக அரைசதம் அடித்த வீரர்கள் பட்டியலில் இணைந்தார். அதுமட்டுமின்றி, சென்னை அணிக்காக அதிவேகமாக அரைசதம் அடித்த பட்டியலில் 2-ம் இடத்தில் மொயின் அலி உள்ளார். முதலிடத்தில் சுரேஷ் ரெய்னா 16 பந்துகளிலும், தோனி 20 பந்துகளில் அரைசதம் அடித்துள்ளது குறிப்பிடத்தக்கது.
