இந்தியா-வங்கதேசம் மோதும் முதல் டெஸ்டின் 4-வது நாள் ஆட்டநேர முடிவில் வங்கதேசஅணி 272/6 ரன்கள் குவிப்பு.
இந்தியா-வங்கதேசம் மோதும் டெஸ்ட் தொடரின் முதல் போட்டி நடைபெற்று வருகிறது. டாஸ் வென்று முதலில் பேட்டிங் தேர்வு செய்த இந்திய அணி, முதல் இன்னிங்சில் 410 ரன்களுக்கும், வங்கதேச அணி 150 ரன்களுக்கும் ஆல் அவுட் ஆனது.
254 ரன்கள் முன்னிலையுடன் இரண்டாவது இன்னிங்ஸை தொடர்ந்த இந்திய அணி, 2 விக்கெட் இழப்புக்கு 258 ரன்கள் எடுத்து 512 ரன்கள் முன்னிலையுடன் டிக்ளர் செய்தது. இதனை தொடர்ந்து இரண்டாவது இன்னிங்சில் களமிறங்கிய வங்கதேச அணி, நிதான ஆட்டத்தை வெளிப்படுத்தி வருகிறது.
தொடக்க வீரர்களாக களமிறங்கிய நஜ்முல் ஹூசைன் மற்றும் சாகிர் ஹசன் இருவரும் அரைசதம் கடந்து முதல் விக்கெட்டுக்கு 124 ரன்கள் குவித்தனர். 67 ரன்கள் குவித்த நிலையில் நஜ்முல் ஹூசைன், உமேஷ் யாதவின் பந்தில் ஆட்டமிழந்தார். அதன்பிறகு களமிறங்கிய யாசிர் அலி 5 ரன்னுக்கு அக்சர் பட்டேல் பந்தில் போல்டானார்.
அடுத்து களமிறங்கிய லிட்டன் தாஸ் 19 ரன்களில் குல்தீப் யாதவ் பந்தில் ஆட்டமிழக்க, சாகிர் ஹசன் நிலைத்து நின்று ஆடி 100 ரன்கள் அடித்தார். அதன்பின் அஸ்வின் பந்தில் சாகிர் ஹசன் 100 ரன்களுக்கு ஆட்டமிழந்தார். முஸ்ஃபிக்கர் ரஹீம் 23 ரன்களுக்கு ஆட்டமிழக்க ஷகிப் அல் ஹசன் 40* ரன்களுடன் விளையாடி வருகிறார்.
4-வது நாள் ஆட்டநேர முடிவில் வங்கதேசஅணி 6 விக்கெட்களை இழந்து 272 ரன்கள் குவித்துள்ளது. ஷகிப் அல் ஹசன் 40* ரன்களும், மெஹதி ஹசன் 9* ரன்களும் எடுத்து விளையாடி வருகின்றனர். இன்னும் ஒருநாளே மீதமுள்ள நிலையில் வங்கதேச அணிக்கு வெற்றி பெற 241 ரன்கள் தேவைப்படுகிறது.
இந்திய அணி, வெற்றி பெற இன்னும் 4 விக்கெட்களை தேவைப்படுகிறது. இந்திய அணி சார்பில் அக்சர் பட்டேல் 3 விக்கெட்களை வீழ்த்தியுள்ளார். உமேஷ் யாதவ், குல்தீப் யாதவ், மற்றும் அஸ்வின் தலா 1 விக்கெட்டும் வீழ்த்தினர்.
