அனைத்து மொழிகளுக்கும் மூத்த மொழியாகிய சமஸ்கிருதம் தான் தேசிய மொழி – கங்கனா ரணாவத்!

மத்திய உள்துறை அமைச்சர் அமித் ஷா அவர்கள் ஹிந்தி மொழியை ஆங்கிலத்திற்கு மாற்றாக எடுத்துக்கொள்ள வேண்டும் என அண்மையில் கூறியிருந்தார். அமித்ஷாவின் இந்த கருத்து மக்கள் மத்தியிலும் சர்ச்சையை ஏற்படுத்தியிருந்த நிலையில், அவரது கருத்துக்கு திரையுலக பிரபலங்கள் மற்றும் பல அரசியல்வாதிகளும் தங்கள் கண்டனங்களை தெரிவித்து வந்தனர்.

அந்த வகையில் ஏற்கனவே யுவன் சங்கர் ராஜா, பிரகாஷ்ராஜ் உள்ளிட்ட பல நடிகர்கள் தமிழுக்கு ஆதரவாக தங்கள் கருத்துகளை தெரிவித்தனர். அண்மையில் நடிகர் அஜய் தேவ்கன் ஹிந்திக்கு ஆதரவாக தனது கருத்தை தெரிவித்திருந்தார். தற்பொழுது நடிகை கங்கனா ரனாவத் அவர்கள் புதிய சர்ச்சையை கிளப்பியுள்ளார்.

அதாவது இந்தியாவின் தேசிய மொழியாக சமஸ்கிருதம் தான் இருக்க வேண்டும் என அவர் தெரிவித்துள்ளார். இது தொடர்பாக தாகட் திரைப்பட ட்ரெய்லர் வெளியீட்டு விழாவில் பேசிய அவர், நாட்டின் தேசிய மொழியாக ஹிந்தியை ஏற்கமுடியாது என கூறுபவர்கள் அரசியலமைப்பை  மறுக்கிறார்கள் என்பது தான் அர்த்தம்.

இந்தியாவின் தேசிய மொழியாக சமஸ்கிருதம் தான் இருக்க வேண்டும். தமிழ், ஹிந்தி உள்ளிட்ட அனைத்து மொழிகளிலும் மூத்த மொழி சமஸ்கிருதம் தான் என தெரிவித்துள்ளார். மேலும் பல மொழிகள் மற்றும் கலாச்சாரங்கள் அடங்கிய பன்முகத்தன்மை கொண்ட இந்தியாவில் தங்களது மொழி மற்றும் கலாச்சாரம் குறித்து பெருமை கொள்வது அனைவருக்குமான பிறப்புரிமை. நான் பஹாரி என்பதில் பெருமை கொள்கிறேன் என அவர் தெரிவித்துள்ளார்.