பொருளாதாரத்தில் வேகமாக வளரும் நாடு இந்தியா : உலக வங்கி

இந்தியாவின் மொத்த உள்நாட்டு உற்பத்தி இந்த நிதியாண்டில் 7 புள்ளி 3 சதவீதமாக உயரும் என உலக வங்கி தெரிவித்துள்ளது. ஜனவரி மாதத்திற்கான உலக பொருளாதார வளம் தொடர்பாக உலக வங்கி அறிக்கை ஒன்றை வெளியிட்டுள்ளது. இதில் பொருளாதாரத்தில் தொடர்ந்து வேகமாக வளர்ந்து வரும் நாடாக இந்தியா உள்ளதாக தெரிவிக்கப்பட்டுள்ளது.

2018-19ம் நிதியாண்டில் இந்தியாவின் மொத்த உள்நாட்டு உற்பத்தி (ஜிடிபி) 7.3 சதவீதமாக உயரும் எனவும், அடுத்த 2 ஆண்டுகளில் இது 7.5 சதவீதமாகும் எனவும் உலக வங்கி கணித்துள்ளது.

இந்தியாவின் வளர்ச்சி தொடர்ந்து அதிகரித்து வரும் நிலையில், சீனாவின் பொருளாதார வளர்ச்சி இந்த ஆண்டு மற்றும் அடுத்த ஆண்டுகளில் 6 புள்ளி 2 சதவீதமாக சரிவடையும் என்றும் உலக வங்கி அறிக்கையில் தெரிவிக்கப்பட்டுள்ளது. வரும் 2021ல் இது 6 சதவீதமாக சரிவடையும் என்றும் கூறப்பட்டுள்ளது.

இந்தியாவில் முதலீடுகள் மற்றும் கொள்முதல்கள் அதிகரித்துள்ளதால் பொருளாதார வளர்ச்சி உயரும் என்று உலக வங்கி கணித்துள்ளது. மேலும் தொழில் வளர்ச்சியில் இந்தியா குறிப்பிடும்படியான இடத்தை எட்டியுள்ளதாகவும் தெரிவிக்கப்பட்டுள்ளது.