சூப்பர் ஸ்டார் ரஜினிகாந்தின் அண்ணாத்த படம் கைவிடப்பட்டதாக வெளியான தகவல் வதந்தி என்று படக்குழுவினர் விளக்கமளித்துள்ளனர்.
சூப்பர் ஸ்டார் ரஜினிகாந்த் தற்போது அண்ணாத்த படத்தில் நடித்து வருகிறார். சிறுத்தை சிவா இயக்கத்தில் சன் பிக்சர்ஸ் நிறுவனம் தயாரிக்கும் இந்தப் படத்தில் கீர்த்தி சுரேஷ், நயன்தாரா, குஷ்பு, மீனா உள்ளிட்ட பல பிரபலங்கள் நடிக்கவுள்ளனர். டி. இமான் முதல்முறையாக ரஜினிகாந்த் படத்திற்கு இசையமைக்கிறார். சமீபத்தில் இந்த படத்தின் டைட்டில் தீம் வெளியாகி ரசிகர்கள் மத்தியில் பெரும் வரவேற்பைப் பெற்றது. ஐதராபாத்தில் விறுவிறுப்பாக நடந்து வந்த படப்பிடிப்பு கொரோனா வைரஸ் காரணமாக ரத்து செய்யப்பட்டதை அடுத்து, மீண்டும் ஷூட்டிங் தொடங்கவிருந்த படக்குழுவினரை ரஜினிகாந்த் வேண்டாமென்று கூறி தடை செய்து கொரோனா தொற்று முற்றிலுமாக முடிவுக்கு வந்ததும் படப்பிடிப்பு ஆரம்பிக்கலாம் என்று கூறியுள்ளதாக தகவல்கள் வெளியானது.
தீபாவளிக்கு திரைக்கு வரவிருந்த படத்தை பொங்கலுக்கு தள்ளி வைத்தனர். இன்னும் 50% படப்பிடிப்புகள் மீதமிருக்கும் நிலையில் படத்தை கைவிட்டதாகவும், ரஜினிகாந்த் அவர்கள் வாங்கிய சம்பளத்தை திருப்பி கொடுத்ததாகவும் தகவல்கள் வெளியாகின. இதற்கு மறுப்பு தெரிவித்து படக்குழுவினர் கூறியதாவது, அண்ணாத்த படத்தை கைவிட்டதாக வெளியான தகவல் முற்றிலும் வதந்தி என்றும், அரசின் அனுமதி கிடைத்தவுடன் படப்பிடிப்புகள் தொடங்கப்படும் என்றும் தெரிவித்துள்ளனர்.
