Aditya-L1 Mission: ஆதித்யா எல்-1 விண்கலம் வெற்றிகரமாக சுற்றுவட்ட பாதையில் நிலை நிறுத்தம்..! இஸ்ரோ அறிவிப்பு.!

ஆந்திர மாநிலம் ஸ்ரீஹரிகோட்டாவில் உள்ள சதீஷ் தவான் ராக்கெட் ஏவு தளத்திலிருந்து, சூரியனை ஆய்வு செய்வதற்கான இந்தியாவின் முதல் விண்கலமான ஆதித்யா எல்-1, பி.எஸ்.எல்.வி.-சி57 ராக்கெட் மூலம் இன்று காலை சரியாக 11.50 மணியளவில் விண்ணில் வெற்றிகரமாக செலுத்தப்பட்டது.

ஆதித்யா எல்-1 விண்கலத்தை வெற்றிகரமாக விண்ணில் ஏவியதன் மூலம் புதிய அத்தியாயத்தை படைத்துள்ளது. ஆதித்யா எல்-1 வெற்றிகரமாக விண்ணில் செலுத்தப்பட்டதால் இஸ்ரோ விஞ்ஞானிகள் உட்பட அனைவரும் மகிழ்ச்சியில் உள்ளனர். சந்திரயான்-3 வெற்றிகரமாக விண்ணில் ஏவப்பட்டதை தொடர்ந்து பலரும் வாழ்த்துக்களை தெரிவித்து வருகின்றனர்.

இந்நிலையில், ஆதித்யா-எல்1 விண்கலம் பிஎஸ்எல்வி ராக்கெட்டில் இருந்து சரியாக 648 கி.மீ உயரத்தில் பிரிக்கப்பட்டு, புவியின் சுற்றுவட்டப்பாதையில் வெற்றிகரமாக நிலைநிறுத்தப்பட்டுள்ளது என்று இஸ்ரோ தெரிவித்துள்ளது. தற்போது, 2,298 கி.மீ உயரத்தில் இருந்து ஆதித்யா-எல்1 விண்கலம் தனித்து தனது பயணத்தைத் தொடங்கியுள்ளது.

இது குறித்து கூறிய இஸ்ரோ, ” PSLV-C57 மூலம் ஆதித்யா-எல்1 ஏவுதல் வெற்றிகரமாக நிறைவேற்றப்பட்டது. பிஎஸ்எல்வி ராக்கெட் செயற்கைக்கோளை சுற்றுப்பாதையில் துல்லியமாக நிலைநிறுத்தியுள்ளது. இந்தியாவின் முதல் சூரிய ஆய்வகம் சூரியன்-பூமி L1 புள்ளி இலக்கை நோக்கி தனது பயணத்தைத் தொடங்கியுள்ளது.” என்று தெரிவித்துள்ளது.