இன்று தொடங்கும் 16-வது ஐபிஎல் தொடரின் முதல் போட்டியில் சிஎஸ்கே மற்றும் குஜராத் டைட்டன்ஸ் அணிகள் மோதுகின்றன.
இந்தியாவின் மிகப்பெரிய கிரிக்கெட் திருவிழாவான ஐபிஎல் தொடர், இன்று குஜராத் அகமதாபாத்தில் தொடங்குகிறது. 10 அணிகள் பங்கேற்கும் ஐபிஎல் தொடர், இன்று தொடங்கி மே 21 வரை கிட்டத்தட்ட 50 நாட்களுக்கும் மேல் நடைபெறுகிறது. இதில் முதல் போட்டியில் நடப்பு சாம்பியன் குஜராத் டைட்டன்ஸ் மற்றும் சென்னை சூப்பர் கிங்ஸ் அணிகள் விளையாடுகின்றன.
கடந்த ஆண்டு அறிமுகமான ஹர்டிக் பாண்டியா தலைமையிலான குஜராத் அணி, கடந்த ஐபிஎல் 2022இல் சாம்பியன் பட்டம் வென்றது. தோனி தலைமையிலான சிஎஸ்கே அணி, கடந்த ஐபிஎல் தொடரில் பிளேஆஃப் சுற்றுக்கு தகுதி பெறவில்லை. தோனிக்கு இது கடைசி ஐபிஎல் தொடராக இருக்கும் என்று கூறப்படுகிறது, இதனால் இந்த ஐபிஎல் தொடரில் கோப்பையை வெல்லும் முனைப்பில் சிஎஸ்கே அணி களமிறங்கிகிறது.
சிஎஸ்கே அணியில் ருதுராஜ், கான்வே, மொயீன் அலி, ராயுடு, டுபே, தோனி , ஜடேஜா, பென் ஸ்டோக்ஸ், தீபக் சஹர், ஆகியோருடன் பேட்டிங், பவுலிங் என இரண்டிலும் சம வலிமையுடன் காணப்படுகிறது. குஜராத் அணியில் ஹர்டிக் பாண்டியா, ரஷீத் கான், சுப்மன் கில், வில்லியம்சன், மில்லர், தீவட்டியா, பெர்குசன், ஷமி என சம பலத்துடன் இருப்பதால் இன்றைய போட்டியில் அதிரடிக்கு பஞ்சமிருக்காது என்று எதிர்பார்க்கப்படுகிறது.
சிஎஸ்கே(உத்தேச அணி): டெவன் கான்வே, ராயுடு, ருதுராஜ் கெய்க்வாட், மொயீன் அலி, பென் ஸ்டோக்ஸ், டுபே, ஜடேஜா, டுவைன் பிரிட்டோரியஸ், எம்எஸ் தோனி(C/W), சாஹர், சிமர்ஜீத் சிங்
குஜராத் டைட்டன்ஸ்(உத்தேச அணி): சுப்மன் கில், விருத்திமான் சாஹா (W), கேன் வில்லியம்சன், ஹர்திக் பாண்டியா (C), மேத்யூ வேட், ராகுல் தீவட்டியா, ரஷித் கான், சாய் கிஷோர், யாஷ் தயாள், அல்சாரி ஜோசப், முகமது ஷமி