இன்று சர்வதேச யோகா தினம்…!

இன்று சர்வதேச யோகா தினம்.

யோகா என்பது உடல், மனம், அறிவு, உணர்வு மற்றும் ஆன்மீக வளர்ச்சிக்கும், சமன்பாட்டிற்கும் உதவிடும் ஒப்பற்ற கலை ஆகும். ஆண்டுதோறும் ஜூன் 21-ஆம் தேதி சர்வதேச யோகா தினமாக கொண்டாடப்படுகிறது.

இந்திய பிரதமர் நரேந்திர மோடி அவர்கள் ஐநா பொதுச்சபையில் 2014-ஆம் ஆண்டு செப்டம்பர் 27-ம் தேதி, 5 ஆயிரம் ஆண்டுகள் பழமை வாய்ந்த யோகக் கலையின் பெருமையை உலகம் முழுவதும் பரவச் செய்யும் வகையில், சர்வதேச யோகா நாளாக ஒரு நாளை அறிவிக்க வேண்டும் என்று வலியுறுத்தி உரையாற்றியிருந்தார்.

இதற்காக அவர், ஜூன் 21-ஆம் நாளை பரிந்துரைத்திருந்தார். இதனையடுத்து, பிரதமர் மோடியின் பரிந்துரையை அமெரிக்கா, கனடா, சீனா உட்பட பல நாடுகள் ஆதரித்தன. இந்நிலையில் 2014-டிசம்பர் 11ஆம் தேதியன்று 193 உறுப்பினர்கள் கொண்ட ஐக்கிய நாடுகள் பொதுச் சபை, ஜூன் 21 ஆம் நாளை பன்னாட்டு யோகா நாளாக அறிவித்து, தீர்மானம் நிறைவேற்றியது.

இந்நிலையில் 2015-ஆம் ஆண்டு ஜூன் 21-ஆம் தேதி முதல் முறையாக சர்வதேச யோகா தினம் கொண்டாடப்பட்டது. இதற்காக இந்திய தலைநகர் டெல்லியில் பிரம்மாண்டமான ஏற்பாடுகள் செய்யப்பட்ட நிலையில், இந்நிகழ்ச்சியை இந்திய பிரதமர் நரேந்திர மோடி அவர்கள் தலைமை வகித்து நடத்தினார்.