சிறுவன் 'கொரோனா' வுக்கு பரிசளித்த ஹாலிவுட் நடிகர்.!

நடிகர் டாம் ஹாங்க்ஷிற்கு 8 வயதான கொரோனா டி வ்ரீஸ் என்ற சிறுவன் கடிதம் ஒன்றை எழுதியுள்ளார்.

பிரபல ஹாலிவுட்  நடிகர் டாம் ஹாங்க்ஸ் மற்றும் அவரது மனைவியான ரீட்டா வில்சன் ஆகியோர் ஆஸ்திரேலியாவிற்கு சென்ற போது கொரோனா தொற்று நோயால் பாதிக்கப்பட்டுள்ளார்கள். அதனையடுத்து அங்கு சிகிச்சை பெற்று வந்த இருவரும் சில நாட்களில் குணமடைந்து அமெரிக்காவிற்கு திரும்பியுள்ளார். இந்த நிலையில் அந்த நடிகருக்கு 8 வயதான கொரோனா டி வ்ரீஸ் என்ற சிறுவன் கடிதம் ஒன்றை எழுதியுள்ளார். அதில் உங்களுக்கும், உங்களது மனைவிக்கும் கொரோனாவால் பாதிக்கப்பட்டதாக செய்திகள் வாயிலாக தெரிய வந்தது, இப்போது நலமாக இருக்கிறீர்களா என்று கேட்டுள்ளார்.

மேலும் எனக்கு என் பெயர் மிகவும் பிடிக்கும், ஆனால் எனது பள்ளியில் உள்ள மாணவர்கள் என்னை கொரோனா வைரஸ் என்று கூறி கிண்டல் செய்வதாகவும் , அதை கேட்டதும் கவலையுடன் சேர்த்து கோவமும் வருகிறது என்று கூறியுள்ளார். இந்த நிலையில் நடிகர் டாம் ஹாங்க்ஸ் அந்த சிறுவனுக்கு டைப் ரைட்டரை பரிசாக அனுப்பி, அதனுடன் உங்களின் கடிதத்தால் நானும் என் மனைவியும் மகிழ்ச்சி அடைகிறோம். நானும் உங்களுக்கு ஒரு நண்பர் தான். இந்த டைப் ரைட்டர் உங்களுக்கு பொருத்தமாக இருக்கும். இதை எப்படி பயன்படுத்துவது என்பதை தெரிந்து கொண்டு, இதன் மூலம் எனக்கு பதில் கடிதம் அனுப்புங்கள் என்று தெரிவித்துள்ளார்.