கர்நாடகா சட்டமன்ற தேர்தல் – அரசியலில் இருந்து விலகுவதாக அறிவித்த பாஜக முக்கியப்புள்ளி..!

பாஜக சட்டமன்ற உறுப்பினரும், முன்னாள் அமைச்சருமான ஈஸ்வரப்பா தேர்தல் அரசியலில் இருந்து விலகுவதாக அறிவிப்பு. 

கர்நாடக மாநில சட்டமன்ற தேர்தல் விரைவில் நடைபெற உள்ளது. இதற்காக பிரதான கட்சிகள் தங்கள் தேர்தல் முன்னேற்பாட்டு பணிகளில் தீவிரமாக ஈடுபட்டு வருகின்றனர். பாஜக மற்றும் காங்கிரஸ் கட்சி இடையே தீவிர போட்டி நிலவி வருகிறது.

இந்த நிலையில், கர்நாடக மாநிலம் சிவமோகா தொகுதி பாஜக சட்டமன்ற உறுப்பினரும், முன்னாள் அமைச்சருமான ஈஸ்வரப்பா தேர்தல் அரசியலில் இருந்து விலகுவதாக பாஜக தேசிய தலைவர் ஜே.பி.நட்டாவுக்கு கடிதம் எழுதியுள்ளார்.

இது தொடர்பாக அவர் எழுதியுள்ள  கடிதத்தில், தேர்தல் அரசியலில் இருந்து ஓய்வு பெறுவதால் தனது பெயரை எந்த தொகுதிக்கும் பரிந்துரை செய்ய வேண்டாம் எனவும், தனது 40 வருட அரசியல் பயணத்தில் உடனிருந்த அனைவருக்கும் நெஞ்சார்ந்த நன்றியையும் தெரிவித்துள்ளார்.

கர்நாடகா சட்டப்பேரவை தேர்தலுக்கான பாஜக வேட்பாளர் பட்டியல் இன்று மாலையில் வெளிவரும் எனக் கூறப்பட்ட நிலையில் ஓய்வு அறிவிப்பு வெளிவந்துள்ளது.