நடிகை மீராமிதுன் நீதிமன்றத்தில் ஆஜர்.!

எழும்பூர் காவல் நிலையத்தில் வழக்குப்பதிவு செய்யப்பட்ட நிலையில், எழும்பூர் நீதிமன்றத்தில் நடிகை மீரா மிதுன் ஆஜர்.

நடிகை மீரா மிதுன் பட்டியலினத்தவர்களை அவதூறாக பேசியது தொடர்பாக இவர் மீது, விடுதலை சிறுத்தைகள் கட்சியின் நிர்வாகி வன்னியரசு புகாரின் அளித்தார். இதனையடுத்து, சென்னை சைபர் க்ரைம் போலீசார் வன்கொடுமை தடை சட்டம் உள்ளிட்ட 7 பிரிவுகளின் கீழ் மீரா மிதுன் மீது வழக்குப்பதிவு செய்து கடந்த ஆகஸ்ட் மாதம் 14-ஆம் தேதி கைது செய்தனர். அதன் பின் இவருக்கு ஜாமின் வழங்கப்பட்டது.

இதனையடுத்து, சென்னையை சேர்ந்த ஒருவர் நடிகை மீரா மிதுன் தன்னை பற்றி அவதூறான கருத்துக்கள் பரப்புவதாகவும், அவரை கைது செய்ய வேண்டும் என புகார் அளித்திருந்தார். புகார் அளித்ததையடுத்து சென்னை காவல்துறையினர் வழக்கு பதிவு செய்தனர். அதைபோல் எழும்பூரில், இருக்கும் ஒரு நட்சத்திர ஓட்டல் ஊழியர் ஒருவரை மிரட்டியதாக புகார் அளிக்கப்பட்டது.

புகாரின் அடிப்படையில், நடிகை மீரா மிதுன் மீது ஆபாசமாகப் பேசுதல், கொலை மிரட்டல் விடுத்தல் என்ற இரண்டு பிரிவின் கீழ் எழும்பூர் காவல்நிலையத்தில் வழக்கு பதிவு செய்தனர். இந்நிலையில், இந்த வழக்கின் விசாரணைக்காக மீரா மிதுன் இன்று நீதிமன்றத்தில் ஆஜராகிறார்.