700 கிளப் கோல்களை அடித்து வரலாறு படைத்த ரொனால்டோ!!

மான்செஸ்டர் அணிக்காக விளையாடி வரும் ரொனால்டோ, 700 கிளப் கோல்களை அடித்த முதல் வீரர் என்ற வரலாற்று சாதனை படைத்துள்ளார்.

பிரீமியர் லீக் கால்பந்து தொடரில், எவெர்ட்டன் அணிக்கு எதிராக நேற்று நடைபெற்ற போட்டியில் மான்செஸ்டர் அணிக்காக ரொனால்டோ அடித்த கோலின் மூலம் அவர் இந்த மைல்கல்லை எட்டியுள்ளார். 37 வயதான ரொனால்டோ தனது கால்பந்தாட்ட வரலாற்றில் 943 போட்டிகளில் விளையாடி 700 கோல்களை அடித்துள்ளார். ரொனால்டோ இதுவரை ஸ்போர்ட்டிங் கிளப் அணி, மான்செஸ்டர் யுனைட்டட் அணி, ரியல் மாட்ரிட் அணி, மற்றும் ஜுவென்ச்சஸ் அணிக்காக மொத்தமாக 943 போட்டிகளில் விளையாடியுள்ளார்.

ரொனால்டோ நேற்று அடித்த கோல் மூலம் மான்செஸ்டர் யுனைட்டட் அணிக்காக 144 கோல்களையும், ரியல் மாட்ரிட் அணிக்காக 450 கோல்களையும், ஜுவென்ச்சஸ் அணிக்காக 101 கோல்களையும், ஸ்போர்ட்டிங் கிளப் அணிக்காக 5 கோல்களையும் மொத்தமாக 700 கிளப் கோல்களை அடித்து வரலாற்று சாதனையை நிகழ்த்தியுள்ளார்.