வெற்றி பெற்ற இன்டர் மியாமி..! 2 கோல் மற்றும் அசிஸ்ட் செய்து அசத்திய மெஸ்ஸி..!

Lionel Messi [Image source :Twitter/ @StokeyyG2]

லீக்ஸ் கோப்பை தொடரில் தனது 2வது போட்டியில், இன்டர் மியாமி அணி 4-0 என்ற கோல் கணக்கில் வெற்றி பெற்றுள்ளது.

இந்த ஆண்டிற்கான லீக்ஸ் கோப்பை தொடர் போட்டிகள் வெகு சிறப்பாக நடைபெற்றுக் கொண்டிருக்கிறது. இதில் அமெரிக்க கிளப்பான இன்டர் மியாமி அணிக்கும் அட்லாண்டா யுனைடெட் அணிக்கும் இடையே டிஆர்வி பிஎன்கே ஸ்டேடியத்தில் நடைபெற்ற போட்டியில் இன்டர் மியாமி அணி 4-0 என்ற கோல் கணக்கில் வெற்றி பெற்றது.

இதில் கால்பந்து ஜாம்பவான் லியோனல் மெஸ்ஸி, இன்டர் மியாமி அணிக்காக இரண்டு கோல்களை அடித்தும் தனது அணி வீரர் ஒரு கோலை அடிப்பதற்கு உதவியும் (அசிஸ்ட்) செய்து அசத்தியுள்ளார். ஆட்டம் தொடங்கியதும் மெஸ்ஸி 8 வது நிமிடத்தில் ஒரு கோலும், 22 வது நிமிடத்தில் மற்றொரு கோலையும் அடித்தார்.

இதன் பிறகு, தனது கைக்கு கிடைத்த மற்றொரு பந்தை, எதிர் அணியிடம் இருந்து காப்பாற்றி தனது அணியின் சக வீரரான ராபர்ட் டைலரிடம் ஒப்படைத்தார். ராபர்ட் அந்த பந்தை 53 வது நிமிடத்தில் கோலாக மாற்றினார். பின், மற்றொரு வீரரான கிறிஸ்டோபர் 84 நிமிடத்தில் ஒரு கோல் அடித்தார்.

இதன்மூலம், இன்டர் மியாமி அணி 4 கோல்களை எடுத்து வெற்றி பெற்றது. இதற்கு முன்னதாக நடைபெற்ற போட்டியில் இன்டர் மியாமி, மெக்சிகோ அணியான குரூஸ் அசுல் அணியை 2-1 என்ற கோல் கணக்கில் வென்றது. இரண்டு போட்டிகளில் வெற்றி பெற்றதன் மூலம் லீக்ஸ் கோப்பை தொடரின் ஜே பிரிவில் 6 புள்ளிகளை பெற்று இன்டர் மியாமி முன்னிலையில் உள்ளது.

அர்ஜெண்டினா கால்பந்து நட்சத்திரம் மெஸ்ஸி, இன்டர் மியாமியில் இணைந்ததில் இருந்து இதுவரை நடைபெற்ற இந்த இரண்டு போட்டியையும் சேர்த்து, அணிக்காக 3 கோல்களை பதிவு செய்துள்ளார் என்பது குறிப்பிடத்தக்கது.