FIFA WorldCup2022: போலந்தை வீழ்த்தி 5 ஆவது முறையாக நாக் அவுட்-க்கு முன்னேறிய மெஸ்ஸியின் அர்ஜென்டினா.!

ஃபிஃபா உலகக்கோப்பையில் போலந்து அணியை வீழ்த்தி 5ஆவது முறையாக நாக் அவுட் சுற்றுக்கு அர்ஜென்டினா முன்னேறியுள்ளது.

கத்தாரில் நடந்து வரும் ஃபிஃபா கால்பந்து உலகக் கோப்பை 2022 தொடரில் குரூப்-சியில் இடம் பெற்ற லியோனல் மெஸ்ஸி தலைமையிலான அர்ஜென்டினா மற்றும் போலந்து அணிகள் இன்று விளையாடியது. இந்த ஆட்டம் ஸ்டேடியம் 974இல் நள்ளிரவு 12:30 மணிக்கு தொடங்கியது.

ஆட்டத்தின் முதல் பாதியில் இரு அணிகளும் கோல் அடிக்க முடியவில்லை, எனினும் அர்ஜென்டினா அணிக்கு கிடைத்த பெனால்டி வாய்ப்பை மெஸ்ஸி தவற விட்டார். இதனால் கோலடிக்கும் வாய்ப்பை மெஸ்ஸி இழந்தார். ஆட்டத்தின் இரண்டாவது பாதி தொடங்கிய முதல் நிமிடத்திலேயே அர்ஜென்டினா அணி வீரர் அலெக்சிஸ் மேக் அலிஸ்டர் ஒரு கோல் அடித்து அர்ஜென்டினா அணியை முன்னிலை பெறச் செய்தார்.

இதன் பிறகு 67 வது நிமிடத்தில் அர்ஜென்டினா அணி வீரர் ஜூலியன் அல்வரஸ் மேலும் ஒரு கோலை அடித்தார். இதனால் 2-0 என்ற கோல் கணக்கில் அர்ஜென்டினா, போலந்து அணியை வெற்றி பெற்றது.

இந்த வெற்றியின் மூலம் அர்ஜென்டினா அணி, குரூப் சி யில் ஆறு புள்ளிகள் பெற்று அடுத்த சுற்றான நாக் அவுட் சுற்றுக்கு ஐந்தாவது முறையாக முன்னேறி உள்ளது.

இதே பிரிவில் இடம் பெற்றுள்ள போலந்து அணியானது (4புள்ளிகள்) மெக்ஸிகோவை (4புள்ளிகள்) விட கோல் வித்யாசத்தில் முன்னிலையில் உள்ளதால், போலந்து அணியும் நாக் அவுட் சுற்றுக்கு முன்னேறி இருக்கிறது.