அதிக சிக்ஸர்…அதிக ரன்கள்…’மிரட்டல் சாதனை’ படைத்தது புள்ளி பட்டியலில் முதலிடத்தை பிடித்த சென்னை.!!

நேற்று நடைபெற்ற ஐபிஎல் கிரிக்கெட் போட்டியில் சென்னை சூப்பர் கிங்ஸ் பல சாதனைகளை படைத்துள்ளது. 

சென்னை சூப்பர் கிங்ஸ் :

நடப்பாண்டு ஐபிஎல் கிரிக்கெட் போட்டியில் சென்னை சூப்பர் கிங்ஸ் அணி அட்டகாசமாக விளையாடி வருகிறது என்றே கூறலாம்.  இதுவரை இந்த சீசனில் 7 போட்டிகள் விளையாடி 5 போட்டியில் வெற்றிபெற்றுள்ளது. குறிப்பாக நேற்று கொல்கத்தா அணியுடன் நடைபெற்ற போட்டியில் அதிரடியாக விளையாடி 49 ரன்கள் வித்தியாசத்தில் வெற்றிபெற்றது.

இந்த போட்டியில் வெற்றிபெற்றது மட்டுமின்றி சென்னை சூப்பர் கிங்ஸ் அணி பல சாதனைகளையும் படைத்துள்ளது. அது என்ன சாதனைகள் என்பதை பற்றி பார்க்கலாம்.

அதிக சிக்ஸர்கள் விளாசிய சென்னை 

கொல்கத்தா அணிக்கு எதிரான நேற்றைய போட்டியில் சென்னை அணி மொத்தமாக 18 சிக்ஸர்கள் விளாசியது. ஒரு இன்னிங்ஸில் சென்னை அணி அடித்த அதிகபட்ச சிக்ஸர் இதுவாகும். இதன் மூலம் சென்னை அணி புதிய சாதனையை படைத்துள்ளது.

இதற்கு முன்பு சென்னை அணி 1 போட்டியில் 17 சிக்ஸர்கள் அடித்திருந்து. இது அணியின்  சாதனை இருந்தது. தற்போது அந்த சாதனை நேற்று முறியடிக்கப்பட்டுள்ளது. இப்போட்டியில் குறிப்பாக, ரஹானே மற்றும் ஷிவம் துபே தலா 5 சிக்ஸர்கள் அடித்து வானவேடிக்கை காட்டினார்கள்.

அதிகபட்ச ரன்கள் 

நேற்று கொல்கத்தா அணிக்கு எதிரான  போட்டியில் முதலில் பேட்டிங் செய்த சென்னை சூப்பர் கிங்ஸ் அணி அதிரடியாக விளையாடி 235 ரன்கள் குவித்து இருந்தது. இதன் மூலம் நடப்பாண்டில் அதிக ரன்கள் குவித்த அணி என்ற சாதனையை சென்னை சூப்பர் கிங்ஸ் அணி படைத்துள்ளது.

235 ரன்கள் என்பது சென்னை அணிக்கு 3-வது அதிகபட்ச ரன்கள் ஆகும். கடந்த 2010-ஆம் ஆண்டு ராஜஸ்தான் அணிக்கு எதிராக சென்னை அணி 246 ரன்கள் எடுத்திருந்தது. அடுத்த படியாக கடந்த 2008-ஆம் ஆண்டு பஞ்சாப் அணிக்கு எதிராக 240 ரன்கள் எடுத்திருந்தது.

புள்ளி விவர பட்டியலில் முதலிடம்

நேற்று கொல்கத்தா அணிக்கு எதிரான போட்டியில் வெற்றி பெற்றதன் மூலம் சென்னை சூப்பர் கிங்ஸ் அணி புள்ளி விவரப்பட்டியலில் 3-வது இடத்தில் இருந்து முதல் இடத்திற்க்கு சென்றது. 10 புள்ளிகளுடன் சென்னை அணி முதல் இடத்தை பிடித்துள்ளது என்பது குறிப்பிடத்தக்கது.