IPL 2018:புள்ளி பட்டியலில் கடைசி இடத்தில் உள்ள டெல்லி அணி,இரண்டாம் இடத்தில் உள்ள கிங்ஸ் லெவன் பஞ்சாப் அணிகள் மோதல்!

by VenuPosted on April 23, 2018

டெல்லி டேர்டெவில்ஸ் – கிங்ஸ் லெவன் பஞ்சாப் அணிகள், ஐபிஎல் தொடரில் 21-வது ஆட்டத்தில் இன்று டெல்லி பெரோஷா கோட்லா மைதானத்தில் நடைபெறும் ஆட்டத்தில் மோதுகின்றன.

கவுதம் காம்பீர் தலைமையிலான டெல்லி அணி 5 ஆட்டங்களில் விளையாடி 4 தோல்விகளை சந்தித்து புள்ளிகள் பட்டியலில் கடைசி இடத்தில் உள்ளது. கடைசியாக நேற்றுமுன்தினம் பெங்களூரு அணியிடம் வீழ்ந்திருந்தது. டி வில்லியர்ஸ் 39 பந்துகளில் 90 ரன்கள் விளாசி டெல்லி அணியின் ஒட்டுமொத்த பந்து வீச்சையும் சிதைவுக்குள்ளாக்கியிருந்தார்.

இந்த சூழ்நிலையில் இன்று தனது சொந்த மண்ணில் பஞ்சாப் அணியை சந்திக்கிறது டெல்லி அணி. தோல்விகளால் துவண்டுள்ள டெல்லி அணிக்கு கிறிஸ் கெயில் கடும் சவாலாக இருக்கக்கூடும். 2 அரை சதங்கள், ஒரு சதத்துடன் அதிரடி பாதைக்கு திரும்பி உள்ள அவர், மீண்டும் ஒரு ரன் வேட்டைக்கு ஆயத்தமாக உள்ளார். அவருடன் கே.எல்.ராகுலும் மிரட்ட காத்திருக்கிறார்.

இந்த சீசனில் பஞ்சாப் அணியை 2-வது முறையாக எதிர்கொள்கிறது டெல்லி அணி. மொகாலியில் நடைபெற்ற முதல் ஆட்டத்தில் டெல்லி அணியை 6 விக்கெட்கள் வித்தியாசத்தில் பஞ்சாப் அணி வீழ்த்தியிருந்தது.

இந்த தோல்விக்கு பதிலடி கொடுக்க வேண்டும் என்றால் டெல்லி அணி ஒட்டுமொத்தமாக எழுச்சி காண வேண்டும். காம்பீர் பேட்டிங்கில் எந்தவித தாக்கத்தையும் ஏற்படுத்தாதது பின்னடைவாக உள்ளது. இதேபோல் ஜேசன் ராய், மெக்ஸ்வெல் ஆகியோரும் தொடர்ச்சியாக சிறந்த திறனை வெளிப்படுத்தத் தவறுகின்றனர். இதனால் வெற்றிக்கான வியூகத்தில் கவனம் செலுத்தும் விதமாக டெல்லி அணி வீரர்கள் தேர்வில் கூடுதல் கவனம் செலுத்தக்கூடும்.

மேலும் செய்திகளுக்கு தினச்சுவடுடன் இணைந்திருங்கள்.