IPL 2018:சேப்பாக்கம் மைதானத்துக்குள் பாம்பு வரும் எதிரொலி …!பாம்பட்டிகளை நோக்கி படையெடுக்கும் போலீசார் …!

by VenuPosted on April 10, 2018

தமிழக வாழ்வுரிமை கட்சித்தலைவர் வேல்முருகன் ஐபிஎல் போட்டிகளுக்கு கடும் எதிர்ப்பு கிளம்பியுள்ள நிலையில் மைதானத்தில் பாம்புகளும் வரலாம் என்று கூறியிருந்தார். இதையடுத்து போலீஸார் பாம்பாட்டிகளை தயார் செய்து வைத்துள்ளதாகவும் தகவல் வெளியாகி உள்ளது.

காவிரி மேலாண்மை அமைக்க வலியுறுத்தி தமிழகம் முழுதும் போராட்டம் வலுத்து வருகிறது. அனைத்து அரசியல் கட்சிகள், விவசாயசங்கங்கள், பொதுமக்கள், இளைஞர்கள் அனைவரும் போராட்டத்தில் குதித்துள்ளனர்.

இந்நிலையில் சென்னையில் சென்னை சூப்பர் கிங்க்ஸ் அணியும் கொல்கத்தா அணியும் மோதும் ஐபிஎல் ஆட்டம் சேப்பாக்கம் மைதானத்தில் நடக்கிறது. இந்த போட்டியை புறக்கணிக்க வேண்டும், போட்டியை நடத்த வேண்டாம் என பல்வேறு கோரிக்கைகள் அரசியல் கட்சிகள், தமிழ் உணர்வாளர்கள் சார்பாக வைக்கப்பட்டு ஆர்பாட்டம் நடந்து வருகிறது.

ஒரு கட்டத்தில் போட்டி நடந்தால் வீரர்களை சிறைபிடிப்போம் என தமீமுன் அன்சாரியும், போட்டி நடக்கும் இடத்தில் புகுந்து போராட்டம் நடத்துவோம் என கருணாஸும் பேட்டி அளித்தனர்.தமிழக வாழ்வுரிமை கட்சித்தலைவர் வேல்முருகன் போட்டி நடக்கும் இடத்தில் பாம்புகளும் வரலாம் என பேட்டி அளித்திருந்தார்.

இதையடுத்து போலீஸார் மைதானத்திற்குள் ஒருவேளை பாம்பு வந்தால் என்ன செய்வது என்று பாம்பாட்டிகளையும், பாம்பு பிடிப்பதில் வல்லவர்களான தீயணைப்புத்துறை வீரர்களையும் தயார் நிலையில் வைத்துள்ளனர்.

மேலும் செய்திகளுக்கு தினச்சுவடுடன் இணைந்திருங்கள்.