#ENGvBAN : மிரளவைத்த டேவிட் மாலன், ஜோ ரூட்..! பங்களாதேஷ் அணிக்கு இமாலய இலக்கு..!

ENGvsBAN 1st

இந்த ஆண்டிற்கான ஐசிசி ஒருநாள் உலககோப்பையானது விறுவிறுப்பாக நடந்து கொண்டிருக்கும் நிலையில், இன்று காலை தொடங்கிய 7 வது போட்டியில் இங்கிலாந்து மற்றும் பங்களாதேஷ் அணிகள் ஹிமாச்சல் பிரதேஷ் கிரிக்கெட் அசோசியேஷன் மைதானத்தில் பலப்பரிட்சை செய்து வருகின்றன. இதில் டாஸ் வென்ற பங்களாதேஷ் அணி பந்துவீச்சை தேர்வு செய்தது.

இதனால் இங்கிலாந்து அணி முதலில் பேட்டிங் செய்ய களமிறங்கியது. அதன்படி ஜானி பேர்ஸ்டோவ், டேவிட் மாலன் ஜோடி தொடக்க ஆட்டக்காரர்களாக முதலில் களத்தில் இறங்கினர். இதில் பேர்ஸ்டோவ் நிதானமாக விளையாடி அரைசதம் கடந்தார். அவருடன் விளையாடிய டேவிட் மாலன்  அதிரடியாக விளையாடி, பங்களாதேஷ் அணியின் பந்துகளை பறக்க விட்டு அரைசதம் அடித்தார்.

இதனைத் தொடர்ந்து பேர்ஸ்டோவ் 52 ரன்களில் ஆட்டமிழக்க, அவரையடுத்து ஜோ ரூட் களமிறங்கினார். டேவிட் மாலன் மற்றும் ஜோ ரூட் இடையேயான பார்ட்னர்ஷிப் அணிக்கு வலுவான தளத்தை அமைத்துக் கொடுத்தது. சிறப்பாக செயல்பட்ட டேவிட் மலான் 107 பந்துகளில் 16 பவுண்டரிகள் மற்றும் 5 சிக்ஸர்கள் அடித்து 140 ரன்களை எடுத்தார். ஆனால், மஹேதி ஹசன் வீசிய பந்தில் ஆட்டமிழந்தார்.

இதன்பிறகு களமிறங்கிய ஜோஸ் பட்லர் 20 ரன்களில் வெளியேற, அபாரமாக விளையாடிக்கொண்டிருந்த ஜோ ரூட் 82 ரன்களில் தனது விக்கெட்டை இழந்தார். தொடர்ந்து, களமிறங்கிய இங்கிலாந்து அணி வீரர்கள், பங்களாதேஷ் அணி வீரர்களின் பந்துவீச்சைத் தாக்குப்பிடிக்க முடியாமல் ஓரளவு ரன்கள் எடுத்து ஆட்டமிழந்து வெளியேறினார்கள். ஆனாலும் கூட  ஜோ ரூட், டேவிட் மாலன் அடித்த ரன்கள் பங்களாதேஷ் அணிக்கும் இமாலய இலக்காக மாறியது.

முடிவில், 50 ஓவர்களில் இங்கிலாந்து அணி 9 விக்கெட்டுகளை 364 ரன்கள் குவித்தது. இதில் டேவிட் மாலன் 140 ரன்களும், ஜோ ரூட் 82 ரன்களும், பேர்ஸ்டோவ் 52 ரன்களும் குவித்தனர். பங்களாதேஷ் அணியில் மஹேதி ஹசன் 4 விக்கெட்டுகளும், ஷோரிஃபுல் இஸ்லாம் 3 விக்கெட்டுகளையும் வீழ்த்தினார்கள். தற்போது, 365 ரன்கள் எடுத்தால் வெற்றி என்ற இலக்கில் பங்களாதேஷ் அணி விளையாடி வருகிறது.