சாம்பியன்ஸ் ட்ராஃபியில் அஸ்வின்? கைகொடுப்பாரா கவுதம் கம்பீர்?

Gambhir-Ashwin [file image]

சென்னை : இந்திய அணியின் மூத்த சுழற்பந்து வீச்சாளரான ரவிச்சந்திரன் அஸ்வின் தற்போது தமிழ்நாடு பிரீமியர் லீக் தொடரின் திண்டுக்கல் அணிக்காக விளையாடி வந்தார். மேலும், அந்த அணியின் கேப்டனாகவும் விளையாடி கோப்பையை வெல்ல முக்கிய காரணமாகவும் இருந்தார்.

அதே நேரம் மறுபக்கம் இந்திய அணி இலங்கை அணியுடன் சுற்று பயணத்தொடர் மேற்கொண்டு வருகிறது. இதில் முதலில் நடைபெற்ற டி20 தொடரை இந்திய அணி 3-0 எனக் கைப்பற்றி இருந்த நிலையில், அடுத்ததாக விளையாடிய 3 போட்டிகளைக் கொண்ட ஒருநாள் தொடரிலும் முதல் போட்டியில் டிராவும், 2-வது போட்டியில் தோல்வியும் சந்தித்தது.

என்னதான் அணியில் குல்தீப் யாதவ் போன்ற சுழல் பந்து வீச்சாளர் இருந்தாலும், அஸ்வின் போன்ற ஒரு அனுபவசாலி வீரர் தேவை என ரசிகர்கள் இந்தியா அணியின் இந்த தோல்விக்குப் பிறகு கூற தொடங்கினார்கள். இதற்கு முன்னரும் இதே போல் அவரது திறமையை நிரூபித்ததால் கடந்த 2022-ஆம் ஆண்டு நடைபெற்ற டி20  உலகக்கோப்பை தொடரில் கலந்து கொண்டு விளையாடினார்.

அதில் 6 விக்கெட்டுகளையும் கைப்பற்றி இருந்தார் என்பது குறிப்பிடத்தக்கது. மேலும், அதற்கு அடுத்த வருடமே 2023-ம் ஆண்டின் 50 ஓவர் உலகக்கோப்பை போட்டியில் இந்திய அணியில் இடம் பெற்றிருந்தார். அதிலும், ஆஸ்திரேலிய அணியுடனான போட்டியில் மட்டுமே அஸ்வின் விளையாடி இருந்தார். அதன் பின் அந்த தொடரில் எந்த ஒரு போட்டியிலும் அவர் விளையாடவில்லை.

தற்போது நடந்து முடிந்த டிஎன்பிஎல் தொடரிலும் பந்து வீச்சில் 9 விக்கெட்டுகளும், பேட்டிங்கில் 3 அரை சதங்களுடன்  252 ரன்களும் எடுத்து தன்னை ஒரு சிறந்த ஆல்ரவுண்டர் என நிரூபித்திருக்கிறார் என்றே கூறலாம்.

இதனைக் கருத்தில் கொண்டு அடுத்த வருடம் நடைபெற இருக்கும் 50 ஓவர் சாம்பியன்ஸ் ட்ராபி தொடரில் அஸ்வினுக்கு ஒருநாள் தொடர்களில் ஒரு வாய்ப்பளித்துப் பார்க்கலாம் என ரசிகர்கள் கூறி வருகின்றனர்.

மேலும், இந்திய அணியின் தற்போதைய பயிற்சியாளராக இருக்கும் கவுதம் கம்பீர் அடுத்த கட்டமாக டெஸ்ட் போட்டிகள் மட்டுமின்றி அஸ்வினுக்கு ஒருநாள் போட்டிகளிலும் வாய்ப்பளிக்க வேண்டும் என இந்திய ரசிகர்கள் இணையத்தில் கூறி வருகின்றனர்.

இதனை எல்லாம் கடந்து பல ஆல்ரவுண்டர் வீரர்கள் அணியில் இருக்கும் பட்சத்தில் அஸ்வினுக்கு சாம்பியன்ஸ் ட்ராபியில் வாய்ப்பு கிடைக்குமா? அதற்குக் கம்பீர் கை கொடுப்பாரா? கிடைத்த வாய்ப்பை அஸ்வின் பயன்படுத்துவாரா? என்பதைப் பொறுத்து இருந்து பார்க்க வேண்டும்.