“அவர் நிச்சயமாக எங்கள் திட்டங்களில் உள்ளார்”- விராட் கோலி..!

நியூசிலாந்துக்கு எதிரான போட்டியில் இந்தியா அணியில் ஷர்துல் தாக்கூர் சேர்க்கப்படுவதை விராட் கோலி சுட்டிக்காட்டியுள்ளார்.

டி20 உலக கோப்பை போட்டி விறுவிறுப்பாக நடைபெற்று வருகின்றது.டி20 உலககோப்பையில் நியூசிலாந்து, இந்தியா விளையாடிய ஒரு போட்டியில் தோல்வியை தழுவியுள்ளது.இரண்டு அணிகளையுமே பாகிஸ்தான் தோற்கடித்தது.டி20 உலக கோப்பைக் போட்டியில் அரையிறுதிக்கான இடத்தை பாகிஸ்தான் கிட்டத்தட்ட உறுதிசெய்துவிட்டது.

இந்த நிலையில்,இன்று நடைபெறவுள்ள போட்டியில் இந்தியா, நியூசிலாந்து அணிகள் மோதுகிறது. இன்று தோல்வியடையும் அணிகள் அரை இறுதி வாய்ப்பை இழக்க அதிக வாய்ப்புள்ளதால் இன்றை போட்டி மிக முக்கியத்துவம் வாய்ந்ததாக பார்க்கப்படுகிறது.இதனால்,இரு அணிகளும் அதிக அழுத்தத்தில் உள்ளன.

இன்றைய போட்டி துபாய் மைதானத்தில் நடைபெறுவதால் டாஸ் வெல்வது முக்கியமாக பார்க்கப்படுகிறது. இந்த மைதானத்தில் இரண்டாவதாக பேட்டிங் செய்த அணியே பெரும்பாலும் வெற்றி பெற்றுள்ளதால் இன்றைய போட்டியில் இந்திய அணி டாஸ் வெல்லும் பட்சத்தில் பீல்டிங் தேர்வு செய்து இரண்டாவது களமிறங்க வேண்டும். இப்போட்டி இரவு 07: 30 மணிக்கு தொடங்கவுள்ளது.

இந்நிலையில்,ஆறாவது பந்துவீச்சு விருப்பம் தேவை என இந்திய அணி கேப்டன் விராட் கோலி நியூசிலாந்துக்கு எதிரான மோதலுக்கு முன்னதாக தெரிவித்துள்ளார்.சனிக்கிழமை நடைபெற்ற போட்டிக்கு முந்தைய செய்தியாளர் சந்திப்பில் ஷர்துல் குறித்து விராட் கோலியிடம் கேள்வி கேட்கப்பட்டது.

அதற்கு பதில் அளித்த கோலி: “ஷர்துல் நிச்சயமாக எங்கள் திட்டத்தில் இருக்கும் ஒருவர்,அவர் நிச்சயமாக அணிக்கு அதிக மதிப்பைக் கொண்டு வரக்கூடிய ஒருவர்.அவர் என்ன பாத்திரத்தை வகிக்கிறார் அல்லது அவர் எங்கு பொருந்துகிறார், அதைப் பற்றி இப்போது என்னால் வெளிப்படையாக பேச முடியாது. ஆனால்,ஷர்துல் சிறந்த திறனைக் கொண்ட ஒருவர்”,என்று கூறினார்.

ஷர்துல் தாக்கூர் ஐபிஎல் 2021 சீசனில் சென்னை சூப்பர் கிங்ஸுடன் சிறப்பாக விளையாடி 21 விக்கெட்டுகளை வீழ்த்தினார்.

ஆறாவது பந்துவீச்சு விருப்பம் இருப்பது மிகவும் முக்கியம்: 

ஆறாவது பந்துவீச்சு விருப்பத்தின் அவசியத்தை கோலி ஒப்புக்கொண்டார், மேலும் அணிக்கு ஆறாவது பந்து வீச்சாளரின் விருப்பத்தை வைத்திருப்பது முக்கியம் என்றும் கூறினார்.தான் அல்லது ஹர்திக் பாண்டியா எதிர்காலத்தில் அணிக்காக அந்த பாத்திரத்தை வகிக்கலாம் என்றும் விராட் கூறியதாவது:

“ஆறாவது பந்துவீச்சு விருப்பம் மிகவும் முக்கியமானது.நான் அல்லது ஹர்திக் பாண்டியா அந்த இடத்தை வகிக்கலாம்.ஆனால்,ஒன்று அல்லது இரண்டு ஓவர்கள் வீச உடல் தகுதியுடன் இருக்க வேண்டும்.ஆறாவது பந்துவீச்சு விருப்பத்தை எப்போது பயன்படுத்த வேண்டும் என்பதை விளையாட்டு சூழ்நிலை தீர்மானிக்கிறது. எங்கள் கடைசி போட்டியில், பாகிஸ்தான் முதலில் பேட்டிங் செய்தால், நானும் ஒன்று அல்லது இரண்டு ஓவர்கள் வீசியிருக்கலாம். ஆனால் இரண்டாவது இன்னிங்ஸில் எங்களுக்கு விக்கெட்டுகள் தேவைப்படும்போது, ​பிரைமரி பவுலர்கள் மூலம் நாங்கள் பந்துவீச வேண்டியிருந்தது”,என்று கூறினார்.

மேலும்,”பாகிஸ்தானுக்கு எதிராக பேட்டிங் செய்யும் போது பாண்டியாவின் வலது தோளில் அடிபட்டது. பின்னர் ஸ்கேன் பரிசோதனைக்கு அழைத்துச் செல்லப்பட்டது தெரியவந்தது. ஹர்திக் பாண்டியா நெட்ஸில் பந்து வீசத் தொடங்கினாலும், அவர் இன்னும் பந்து வீசுவதற்கு முழுமையாகத் தகுதி பெறவேண்டும்”,என்றும் தெரிவித்துள்ளார்.