இந்திய கண் சொட்டு மருந்தில் கிருமியா? 3 பேர் பலி.. 8 பேருக்கு கண்பார்வை இழப்பு – அமெரிக்கா எச்சரிக்கை

இந்தியாவில் இருந்து இறக்குமதி செய்யப்படும் கண் சொட்டு மருந்தில் அசுத்த தண்ணீர் இருப்பதாக அமெரிக்கா எச்சரிக்கை.

சமீப காலமாக இந்தியாவில் தயாரிக்கப்படும் இருமல், சளி சிரப்புகள் மீது புகார்களை எழுந்து வந்த நிலையில், உலக சுகாதார நிறுவனம் இருமல் மருந்தை பயன்படுத்த தடை விதித்துள்ளது. இந்த இருமல் மருந்தால் பலர் உயிரிழந்துள்ளனர் என உஸ்பெகிஸ்தான் உள்ளிட்ட நாடுகள் தெரிவித்திருந்தது. இந்த நிலையில், தற்போது இந்தியாவில் தயாரிக்கப்படும் கண் சொட்டு மருந்தில் கிருமி (அசுத்த நீர்) இருப்பதாக அமெரிக்கா எச்சரிக்கையை விடுத்தது பரபரப்பை கிளப்பியுள்ளது.

கண் சொட்டு மருந்தில் பாக்டீரியா:

இந்தியாவில் இருந்து இறக்குமதி செய்யப்படும் கண் சொட்டு மருந்துகளுடன் தொடர்புடைய அதிக மருந்து-எதிர்ப்பு பாக்டீரியா ஒருவரிடமிருந்து மற்றொருவருக்கு பரவக்கூடும் என்று அமெரிக்காவின் உயர்மட்ட மருத்துவ கண்காணிப்பு நிறுவனம் ஆழ்ந்த கவலையை வெளிப்படுத்தியுள்ளது. யுனைடெட் ஸ்டேட்ஸின் உயர்மட்ட சுகாதார நிறுவனமான, நோய் கட்டுப்பாடு மற்றும் தடுப்பு மையங்கள் (CDC), ஒரு வகை கிருமியான சூடோமோனாஸ் ஏருகினோசாவின் விரிவான மருந்து-எதிர்ப்பு விகாரத்தின் பல மாநில மனிதர்களின் தொற்று பாதிப்பை ஆராய்ந்து வந்தது.

சென்னை நிறுவனம்:

இந்த கிருமி இந்தியாவில் இருந்து இறக்குமதி செய்யப்பட்ட EzriCare செயற்கை கண் சொட்டு மருந்துகளில் காணப்பட்டதாக கூறப்படுகிறது. இந்த சொட்டு மருந்தினை அமெரிக்காவில் பயன்படுத்தி, 3 பேர் உயிரிழந்துள்ளதாகவும், 8 பேருக்கு கண்பார்வை பறிபோனதாகவும், 12 பேருக்கு தொற்று பாதிப்பு ஏற்பட்டுள்ளதாகவும் அமெரிக்கா தெரிவித்துள்ளது. குலோபர் பார்மா ஹெல்த் கேர் நிறுவனம் தயாரித்த கண் சொட்டு மருந்து மீது தான் இந்த புகார் கிளம்பி உள்ளது. இது சென்னையை சேர்ந்த நிறுவனமாகும். அசுத்தமான தண்ணீரால் இந்த சொட்டு மருந்து தயாரிக்கப்படுகிறது என்று அமெரிக்கா குற்றசாட்டி உள்ளது.

தடை செய்ய வேண்டுகோள்:

சென்னைக்கு தெற்கே சுமார் 40 கிலோமீட்டர் தொலைவில் அமைந்துள்ள குளோபல் பார்மா ஹெல்த்கேர், பிப்ரவரியில் அமெரிக்க சந்தைக்கான கண் சொட்டு மருந்து தயாரிப்பை நிறுத்தியது. எனவே, இந்த சொட்டு மருந்தினை உடனடியாக தடை செய்ய வேண்டும் என்றும் தற்போது அமெரிக்கா வேண்டுகோள் விடுத்துள்ளது.  முன்னதாக, அமெரிக்க அரசின் நோய் கட்டுப்பாடு மற்றும் தடுப்பு அமைப்பு, எஸ்ரிகேர், எல்எல்சி, டெல்சாம் பார்மா போன்ற நிறுவனங்களால் விநியோகிக்கப்படும் செயற்கை கண்ணீர் லூப்ரிகண்ட் சொட்டு மருந்துகளால் ஏற்பட்ட பக்க விளைவுகள் பற்றி விசாரணை நடத்தி வந்தது.

அமெரிக்கா எச்சரிக்கை:

இந்திய கண் சொட்டுகளுடன் இணைக்கப்பட்ட அதிக மருந்து எதிர்ப்பு பாக்டீரியா அமெரிக்காவிற்கு பரவக்கூடும் என்று CDC எச்சரிக்கை விடுத்துள்ளது. அமெரிக்க உணவு மற்றும் மருந்து நிர்வாகத்தின் கூற்றுப்படி, அசுத்தமான செயற்கைக் கண்ணீரைப் பயன்படுத்துவது கண் நோய்த்தொற்றுகளின் அபாயத்தை அதிகரிக்கிறது, இது குருட்டுத்தன்மை அல்லது மரணத்திற்கு வழிவகுக்கும்.

சூடோமோனாஸ் ஏருகினோசா என்பது ஒரு பாக்டீரியா ஆகும். இது ரத்தம், நுரையீரல் அல்லது காயங்களில் தொற்றுநோயை ஏற்படுத்தக்கூடும், மேலும் ஆண்டிபயாடிக் எதிர்ப்பு காரணமாக சமீபத்திய ஆண்டுகளில் சிகிச்சையளிப்பது மிகவும் கடினமாகிவிட்டது எனவும் தெரிவிக்கப்படுகிறது. “EzriCare அல்லது Delsam Pharma-ன் கண் சொட்டு மருந்தை பயன்படுத்தியவர்கள், கண் நோய்த்தொற்றின் அறிகுறிகள் இருந்தால் உடனடியாக மருத்துவ உதவியை நாட வேண்டும் என்று தெரிவித்துள்ளது.