“மறு ஆய்வு செய்யணும்”…இரட்டை இலை விவகாரத்தில் அ.தி.மு.க அதிரடி மனு..!

சென்னை : அதிமுக உட்கட்சி விவகாரம் அரசியல் வட்டாரத்தில் பேசுபொருளாக வெடித்துள்ளது.  எடப்பாடி பழனிச்சாமி தரப்பு மற்றும் ஓ.பன்னீர் செல்வம் தரப்பு என இருவருமே இரட்டை இலை சின்னத்திற்கும், அதிமுக கட்சிக்கும் உரிமை கோரி உயர்நீதிமன்றம், தேர்தல் ஆணையம் என முறையிட்டு வருகிறார்கள். இந்த சூழலில் சென்னை உயா் நீதிமன்றத்தில் அ.தி.மு.க-வுக்கு இரட்டை இலை சின்னத்தை ஒதுக்கக்கூடாது என்று தோ்தல் ஆணையத்துக்கு உத்தரவிடக் கோரி, திண்டுக்கல் சூரியமூா்த்தி என்பவர் வழக்கு தொடா்ந்திருந்தாா்.

இந்த வழக்கை விசாரணை செய்த உயர் நீதிமன்றம், 4 வாரங்களுக்குள் தோ்தல் ஆணையம் விசாரித்து இதற்கான முடிவை வழங்கவேண்டும் எனவும் உத்தரவிட்டிருந்தது. எனவே,  இரட்டை இலை சின்னம் தொடா்பாக விசாரணை நடந்து வரும் நிலையில், முன்னாள் எம்.பி.க்களான ஓ.பி.ரவீந்திரநாத் மற்றும் கே.சி.பழனிசாமி உள்ளிட்டோா் தோ்தல் ஆணையத்தில்  அதிமுக பொதுச் செயலராக எடப்பாடி பழனிசாமி தோ்வு செய்யப்பட்டதை அங்கீகரிக்கக் கூடாது எனக் கோரி மனு அளித்தனா்.

இதனையடுத்து, எடப்பாடி பழனிசாமி தரப்பில் அ.தி.மு.க பொதுச்செயலாளர் பதவி தொடர்பாக தேர்தல் ஆணையம் விசாரிக்க தடை விதிக்க வேண்டும் எனவும் பதில் மனு அளிக்கப்பட்டது. அந்த மனுவை உயர் நீதிமன்றம் உடனடியாக விசாரணையும் செய்தது.  அப்போது “எடப்பாடி பழனிசாமி கொடுத்துள்ள இந்த மனுவுக்கு  பதில் அளிக்கவும், அதுவரை இரட்டை இலைச் சின்னம் தொடர்பாக தேர்தல் ஆணையம் முடிவெடுக்க இடைக் காலத் தடை விதிக்கப்படுகிறது” என அறிவித்து உயர்நீதி மன்றம் அதிரடியாக உத்தரவிட்டிருந்தது.

இந்த சூழலில், அதிமுக சார்பில் இரட்டை இலை சின்னம் ஒதுக்க எதிர்ப்பு தெரிவித்த வழக்கில் பிறப்பித்த உத்தரவை மறு ஆய்வு செய்யக் கோரி உயர்நீதி மன்றத்தில் மனு அளிக்கப்பட்டுள்ளது. தேர்தல் சின்னங்கள் ஒதுக்கீடு உத்தரவின்படி மட்டுமே விசாரணை நடத்தப்படவேண்டும் என அதிமுக தொடர்ந்த வழக்கில் போடப்பட்ட உத்தரவையும், சூர்ய மூர்த்தி தொடர்ந்த வழக்கில் கொடுக்கப்பட்ட உத்தரவையும் சேர்க்கக்கோரியும் மறு ஆய்வு மனு கொடுக்கப்பட்டுள்ளது.