தவெக பூத் கமிட்டி: கடும் வெயிலில் நிற்கும் தொண்டர்கள்.., பாஸ் இருப்போருக்கு மட்டும் அனுமதி.!

கோவை : தமிழக வெற்றிக் கழகத்தின் (தவெக) பூத் கமிட்டி கருத்தரங்கம் கோவையில் உள்ள குரும்பபாளையத்தில் தனியார் கல்லூரி வளாகத்தில் ஏப்ரல் 26 மற்றும் 27, 2025 அன்று இரு நாட்கள் நடைபெற்று வருகிறது. இதில் கோவை, நீலகிரி, திருப்பூர், ஈரோடு, கரூர், நாமக்கல், சேலம் ஆகிய 7 மாவட்டங்களைச் சேர்ந்த 16,000-க்கும் மேற்பட்ட வாக்குச்சாவடி முகவர்கள் பங்கேற்கின்றனர்.

தவெக தலைவர் விஜய் இரு நாட்களும் மதியம் 3 மணிக்கு கருத்தரங்கில் பங்கேற்று நிர்வாகிகளிடையே உரையாற்றுகிறார். இந்த நிலையில், கடும் வெயிலிலும் காலை முதலே குவிந்து வருகிறார்கள் தவெக தொண்டர்கள். வாகனங்கள் வெளியே செல்லும் வழியில் நின்று இடையூறு ஏற்படுத்த வேண்டாம் என விடுதி ஊழியர்களும் காவல்துறையினரும் அறிவுரை வழங்கி வர்கின்றனர். இருப்பினும் வழி விடாமல் ”TVK..TVK..TVK” என தொண்டர்கள் முழக்கமிட்டு வருகிறார்கள்.

கருத்தரங்கத்தில் கட்சி துண்டு மற்றும் செல்போன்களுக்கு அனுமதி மறுக்கப்பட்டுள்ளது, மேலும் பாஸ் உள்ள நிர்வாகிகளுக்கு மட்டுமே நுழைவு அனுமதிக்கப்பட்டது. இதனிடையே, கருத்தரங்கம் நடைபெறும் வளாகத்தில் பிளாஸ்டிக் குப்பைகளை அகற்றுவதற்காக தவெக நிர்வாகிகள் தூய்மைப் பணிகளில் ஈடுபட்டனர்.