காந்தி சிலைக்கு நோ.! உழைப்பாளர் சிலைக்கு ஓகே.? குடியரசு தின விழாவில் பார்வையாளர்களுக்கான அனுமதி.?

சென்னையில் மெட்ரோ பணிகள் நடைபெற்று வருவதால் இந்த வருடம் காந்தி சிலை முன்பு குடியரசு தின அணிவகுப்பு நடைபெறாது என தகவல் வெளியாகியுள்ளது.

வழக்கம் போல இந்த வருட குடியரசு தினவிழாவுக்கும் தமிழக அரசு முன்னேற்பாடுகளை தற்போதே தொடங்கி விறுவிறுப்பாக செய்லபடுத்தி வருகிறது. ஆனால் அதில் மிக பெரிய மாற்றம் ஒன்றும் நிகழ்ந்துள்ளது.

ஆண்டுதோறும் சென்னை மெரினா கடற்கரை ஒட்டியுள்ள காமராஜர் சாலையில், டிஜிபி அலுவலகத்திற்கு அருகே காந்தி சிலை முன்பு குடியரசு தினவிழா அணிவகுப்பு நடைபெற்று கவர்னர் தேசிய கொடி ஏற்றிவைப்பார். ஆனால், இந்தாண்டு அப்பகுதியில் மெட்ரோ ரயில் சேவை பணிகளுக்கான கட்டுமான வேலைகள் நடைபெற்று வருவதால் அங்கு நடைபெறாது என தகவல் வெளியாகியுள்ளது.

அதன்படி, மெரினா கடற்கரையில், விவேகானந்தர் இல்லம் அல்லது உழைப்பாளர் சிலை அருகே இந்த அணிவகுப்பு நடைபெற உள்ளதா என அதிகாரிகள் சோதனையிட்டு வருகின்றனர். மேலும், இந்தாண்டு பார்வையாளர்களுக்கு அனுமதி இருக்கிறதா என்கிற விவரமும் இன்னும் வெளிவரவில்லை. இது குறித்த அதிகாரப்பூர்வ தகவல்கள் விரைவில் வெளியாகும் என கூறப்படுகிறது.