“அவங்க அப்பாவை தான் சொல்றாங்க”..கூலிக்காரன் என விமர்சித்த கனிமொழிக்கு சீமான் பதிலடி!

சென்னை : நாம் தமிழர் கட்சி ஒருங்கிணைப்பாளர் சீமான் தந்தை பெரியார் குறித்து தொடர்ச்சியாக விமர்சித்து பேசி வருகிறார்.  இதன் காரணமாக எழுந்த புகாரின் அடிப்படையில் அவர் மீது வழக்குப்பதிவு செய்யப்பட்டுள்ள நிலையில், அதனை கண்டுகொள்ளாமல் தொடர்ச்சியாக பெரியார் பற்றி விமர்சனம் செய்து வருகிறார். உதாரணமாக சொல்லவேண்டும் என்றால் நேற்று பேசியிருந்தார்.

நேற்று ஈரோடு கிழக்கு இடைத்தேர்தல் பிரச்சாரத்தின் போது ” பெரியார் வைத்திருப்பது வெங்காயம்; என் தலைவன் வைத்திருப்பது வெடிகுண்டு. நீ உன் பெரியாரின் வெங்காயத்தை வீசு, நான் என் தலைவன் கொடுத்த வெடிகுண்டை வீசுகிறேன்.பெரியார் ஆரிய அடிமை. அவர் ஆரிய கூட்டாளி மட்டுமல்ல, ஆங்கிலேய அடிமையாகவும் வாழ்ந்திருக்கிறார். திராவிட தத்துவம் செத்துப் போய்விட்டது. தமிழ்த் தேசியம் சத்தோடு எழுந்து வருகிறது” எனவும் பேசியிருந்தார்.

இதனையடுத்து, அரசியல் தலைவர்கள் பலரும்  சீமான் பேச்சுக்கு கண்டனம் தெரிவித்து அவருக்கு பதிலடி கொடுக்கும் வகையில் பேசி வருகிறார்கள். அந்த வகையில், தென்காசி மாவட்டத்தில் விழா ஒன்றில் கலந்து கொண்ட திமுக எம்பி கனிமொழி சீமான் பேச்சுக்கு மறைமுகமாக பதிலடி கொடுத்திருந்தார். அதில் பேசிய அவர் ” மக்களுக்காக போராடி எத்தனை முறை சிறை சென்றாலும் நீதி மன்றத்தில் பெரியார் ஒரு முறை கூட மன்னிப்பு கேட்டது இல்லை.

நான் செய்தது தவறு இல்லை எனக்கு கொடுக்கப்படும் தண்டனையை கொடுங்கள் என கர்ஜித்த ஒரு மனிதர்.தமிழ் தமிழ் எனக் கூறிக்கொண்டு தமிழையும் தமிழர்களையும் கொச்சைப்படுத்தக் கூடிய, பெரியாரை இழிவுபடுத்தக்கூடிய சில கூலிக்காரர்களை எதிர்த்து அரசியல் செய்ய வேண்டிய சூழல் உள்ளது” எனவும் சீமானின் பெயரை குறிப்பிடாமல் மறைமுகமாக கனிமொழி பேசியிருந்தார்.

அதனைத்தொடர்ந்து இன்று ஈரோடு கிழக்கு தொகுதி இடைத்தேர்தல் பிரச்சாரம் மேற்கொண்ட சீமான் கனிமொழிக்கு பதிலடி கொடுக்கும் வகையில் பேசியுள்ளார். செய்தியாளர்களை சந்தித்த அவர் ” சும்மா கூலி காலினுலாம் பேசக்கூடாது..எனக்கு தெரிந்து கனிமொழி அவர்களுடைய அப்பாவையும், பேரறிஞர் அண்ணாவையும் சொல்கிறார் என்று நினைக்கிறேன்.

ஏனென்றால், நான் பெரியாரை இழிவுபடுத்தி பேசவில்லை பெரிய பேசிய கருத்துக்களை பற்றி தான் பேசுகிறேன். பெரியார் பற்றி மட்டும் தான் மற்றவர்கள் பேசுகிறார்கள். ஆனால், பெரியார் என்ன எழுதி வைத்தார்? என்ன பேசினார் என்பது பற்றி யாரும் பேசமாட்டிக்கிறார்கள். இதனை எடுத்து பேசுவதற்கு உங்களுடைய யாருக்கும் துணிவு இல்லை. பெரியார் யார் தெரியுமா? என்று கேட்கிறீர்கள் யார் என்று கேட்டல் சொல்லமாட்டிக்கிறீர்கள்.

திமுக அளவிற்கு பேரறிஞர் அண்ணா, கருணாநிதி, அவர்களை விட யாரவது இழிவா பேசியிருக்கிறார்களா?  கனிமொழி சொல்லும் பெரிய கூலி அவருடைய அப்பா தான். அப்போ நீங்க உங்களுடைய தந்தையை தான் எதிர்த்து பேசிக்கொண்டு இருக்கிறீர்களா? தமிழகத்தில் இத்தனை தொகுதி இருந்தும் நீங்கள் ஏன் தூத்துக்குடிக்கு சென்று போட்டியிட்டீர்கள் என்ற காரணத்தை சொல்ல முடியுமா?.  தூத்துக்குடி மக்களை நம்ப வைத்து ஏமாற்றியவர் நீங்கள். அதனைவிட்டுவிட்டு சும்மா சும்மா கூலி காலினுலாம் சொல்லாதீங்க..உங்க அப்பா தான் பெரிய கூலி” எனவும்  சீமான் சற்று ஆவேசத்துடன் பேசினார்.