மத்திய அரசின் தடுப்பூசி கொள்கையில் வெளிப்படைத்தன்மை இல்லை- டி.ஆர்.பாலு..!

தமிழ்நாட்டுக்கு வாராந்திர அடிப்படையில் தடுப்பூசி வழங்குவதாக மத்திய அரசு ஒப்புக்கொண்டுள்ளது என டி.ஆர்.பாலு தெரிவித்தார்.

கொரோனா தடுப்பூசி, செங்கல்பட்டு தடுப்பூசி உற்பத்தி ஆலையை செயல்பாட்டுக்கு கொண்டுவர மத்திய அமைச்சர் பியூஷ் கோயலை சந்தித்து பேசிய பின்னர் செய்தியாளர்களை சந்தித்த திமுக நாடாளுமன்றக்குழு தலைவர் டி.ஆர்.பாலு, தமிழ்நாட்டுக்கு கூடுதலாக தடுப்பூசி ஒதுக்க வேண்டும் என மத்திய அமைச்சர் பியூஷ் கோயலிடம் வலியுறுத்தினேன். ஜூன் மாதத்தில்  கூடுதலாக வழங்கவேண்டிய தடுப்பூசிகளை மத்திய அரசு வழங்கவில்லை.

மத்திய அரசு அளித்த அனைத்து தடுப்பூசிகளையும் தமிழக அரசு செலுத்திவிட்டது.  மக்கள் தொகை அடிப்படையில் தடுப்பூசிகளை மத்திய அரசு வழங்கவில்லை. மொத்த தடுப்பூசியில் 90 சதவீதம் மாநில அரசுகளுக்கு வழங்க வேண்டும். ரேஷன் கடையில் அரிசி வாங்குவது போல் மத்திய அரசிடம் தடுப்பூசி வாங்கும் நிலை உள்ளது. தமிழ்நாட்டுக்கு வாராந்திர அடிப்படையில் தடுப்பூசி வழங்குவதாக மத்திய அரசு ஒப்புக்கொண்டுள்ளது.

தமிழ்நாட்டுக்கு மட்டும் தடுப்பூசியை மத்திய அரசு குறைத்து வழங்குவதாக  டி.ஆர்.பாலு தெரிவித்தார். தடுப்பூசி குறித்து தமிழக மக்களிடம் விழிப்புணர்வு ஏற்பட்டுள்ளது. ஆனால் தடுப்பூசி இல்லை. மத்திய அரசின் தடுப்பூசி கொள்கையில் வெளிப்படைத்தன்மை இல்லை. தமிழ்நாட்டுக்கு 12 கோடி டோஸ் தேவைப்படுகிறது என தெரிவித்தார்.