மதுபோதையில் கல்லூரிக்குள் நுழைந்து இளைஞர்கள் ரகளை..! 6 பேர் கைது…!

மதுரையில் கல்லூரியில் போதையில் தகராறு செய்த இளைஞர்களை கைது செய்த காவல்துறையினர். 

நேற்று முன்தினம் மதுரை மீனாட்சி அரசு கலைக்கல்லூரி சாலையில் இளைஞர்கள் சிலர் மது போதையில் இருசக்கர வாகனத்தில் ஒலி எழுப்பியவாறு அதிவேகத்தில் சென்றுள்ளனர்.  மேலும், ஆபாச வார்த்தைகளால் கூச்சலிட்டபடி சென்றுள்ளனர்.

இளைஞர்களின் செயல் அங்கிருந்த மாணவிகளை அச்சத்தில் ஆழ்த்திய நிலையில்,  இதனை பார்த்துக் கொண்டிருந்த மாணவி ஒருவரின் தந்தை கல்லூரி அருகே ஏன் இப்படி செய்கிறீர்கள் மாணவிகள் பயப்படுகிறார்கள் என்று தெரிவித்துள்ளார்.

இதனால் ஆத்திரமடைந்த அந்த கும்பல் மாணவியின் தந்தையை தாக்கியதோடு, கல்லூரி வளாகத்திற்குள் சென்று அராஜகத்தில் ஈடுபட்டுள்ளனர். இந்த காட்சிகள் சமூக வலைதளங்களில் வைரலான நிலையில் இந்த சம்பவம் தொடர்பாக செல்லூர் காவல்துறையினர் வழக்கு பதிவு செய்து விசாரணை மேற்கொண்டனர்.

இதனையடுத்து, கல்லூரி அருகே தகராறில் ஈடுபட்ட மதுரை அச்சம்பத்து பகுதியை சேர்ந்த ராமமூர்த்தி, சோமசுந்தரம், சிவஞானம், நாகப்பிரியன், சதீஷ்குமார், அஜித்குமார் ஆகிய ஆறு பேரை கைது செய்து காவல்துறையினர் நீதிமன்றத்தில்  ஆஜர்படுத்தினர்.