கொலைவெறித் தாக்குதல் நடத்திய சம்பவம் கண்டிக்கத்தக்கது – பாமக தலைவர்

மீனவர்கள் மீது இலங்கை கடற்படையினர் கொலைவெறித் தாக்குதல் நடத்திய சம்பவம் கண்டிக்கத்தக்கது என அன்புமணி ராமதாஸ் ட்வீட்.

இலங்கை கடற்படை தாக்குதல்:

தமிழக மீனவர்கள் மீது இலங்கை கடற்படை நேற்று தாக்குதல் நடத்தியுள்ளது. மயிலாடுதுறை, காரைக்கால் பகுதியை சேர்ந்த மீனவர்கள் 11 பேர் கோடியக்கரை அருகே மீன் பிடித்து கொண்டிருந்தபோது இலங்கை கடற்படை தாக்குதல் நடத்தியுள்ளது. தமிழக மீனவர்கள் மீது தாக்குதல் நடத்தி அவர்களிடம் இருந்து மீன், வலை மற்றும் ஜிபிஎஸ் கருவிகள் உள்ளிட்டவைகளை பறிமுதல் செய்துள்ளது.

பாமக கண்டனம்:

படகில் இருந்த தங்களை கடலில் தள்ளிவிட்டு அவர்களை துன்புறுத்தியதாகவும் மீனவர்கள் குற்றசாட்டியுள்ளனர். இதற்கு அரசியல் தலைவர்கள் தங்களது கண்டனங்களை தெரிவித்து வருகின்றனர். அந்தவகையில், இலங்கை கடற்படையினர் கொலைவெறித் தாக்குதல் நடத்திய சம்பவம் கண்டிக்கத்தக்கது என்று பாமக தலைவர் அன்புமணி ராமதாஸ் தெரிவித்துள்ளார்.

இது கண்டிக்கத்தக்கது:

அவரது பதிவில், வங்கக்கடலில் கோடியக்கரை அருகே மீன்பிடித்துக் கொண்டிருந்த தமிழகம் மற்றும் புதுச்சேரி மீனவர்கள் மீது இலங்கை கடற்படையினர் கொலைவெறித் தாக்குதல் நடத்தியுள்ளனர். மீன் உள்ளிட்ட உடைமைகளை கொள்ளையடித்துச் சென்றுள்ளனர். இது கண்டிக்கத்தக்கது.

சகித்துக் கொள்ள முடியாது:

கடந்த 24-ஆம் தேதி வங்கக்கடலில் மீன்பிடித்த தரங்கம்பாடி மீனவர்கள் மீது இலங்கைக் கடற்படையினர் தாக்குதல் நடத்தினார்கள். அதனால் ஏற்பட்ட அச்சமும், பதற்றமும் விலகுவதற்கு முன்பாகவே அடுத்த தாக்குதல் நடந்துள்ளது. இதில் 11 பேர் காயமடைந்துள்ளனர். இதை சகித்துக் கொள்ள முடியாது. தமிழக மீனவர்கள் தாக்கப்பட்ட இரு நிகழ்வுகளும் இந்திய கடல் எல்லைக்குள் தான் நடந்துள்ளன.

கைது செய்ய வேண்டும்:

மீனவர்கள் எல்லை தாண்டினால் கூட அவர்களைத் தாக்கும் அதிகாரம் இலங்கை கடற்படைக்கு இல்லை. அத்தகைய சூழலில் இந்திய எல்லைக்குள் நுழைந்து தாக்கியதை இந்தியா வேடிக்கைப் பார்க்கக்கூடாது. தமிழக மீனவர்களைத் தாக்கிய இலங்கைக் கடற்படையினர் மீது காவல்துறை வழக்குப்பதிவு செய்து கைது செய்ய வேண்டும். இது தொடர்பாக இந்தியாவுக்கான இலங்கைத் தூதரை மத்திய அரசு நேரில் அழைத்து கண்டிக்க வேண்டும் என்று வலியுறுத்துகிறேன் என கூறியுள்ளார்.