தூத்துக்குடி விவகாரத்தில் தமிழக உளவுத்துறை தோல்வியடைந்து விட்டது : தமிழிசை ..!

நேற்று தூத்துக்குடியில் ஸ்டெர்லைட் ஆலை விரிவாக்கத்திற்கு தடைவிதிக்கக் கோரி குமரெட்டியார்புரம் கிராம மக்கள் தொடர்ந்து 100வது நாளாக போராட்டத்தில் ஈடுபட்டனர்.

ஸ்டெர்லைட் ஆலையை மூடக்கோரி தூத்துக்குடி தூய பனிமய மாதா பேராலயம் அருகே நூற்றுக்கும் மேற்பட்டோர் கருப்புக்கொடியுடன் போராட்டம் நடத்தினர். அவர்களுடன் போலீசார் பேச்சுவார்த்தை நடத்தி பார்த்தனர். ஆனால் போலீசாரின் பேச்சை கேட்காமல் அவர்கள் தொடர்ச்சியாக தங்களது போராட்டத்தை முன்னெடுத்தனர். ஸ்டெர்லைட் ஆலையை சுற்றி ஏற்கனவே 144 தடை உத்தரவு பிறப்பிக்கப்பட்டுள்ள நிலையில் பொதுமக்கள் தடை உத்தரவை பொருட்படுத்தாமல் ஸ்டெர்லைட் ஆலையை முற்றுகையிட முயன்றனர். அவர்களை போலீசார் தடுப்புகளை வைத்து தடுத்து பார்த்தனர். அப்போது போலீசாருக்கும் போராட்டக்காரர்களுக்கும் இடையே தள்ளுமுள்ளு ஏற்பட்டது.

இதையடுத்து போராட்டத்தை கட்டுக்குள் கொண்டுவர முயன்ற காவல்துறையினர், 3 முறை துப்பாக்கிச் சூடு நடத்தினர்.தூத்துக்குடியில் நேற்றும் இன்றும்  நடந்த துப்பாக்கிச்சூட்டில் பலர்  உயிரிழந்துள்ளனர்.

தூத்துக்குடியில் துப்பாக்கிச்சூடு சம்பவத்தில் இறப்புகள் தடுக்கப்பட்டிருக்க வேணடும் என பாஜக தமிழக தலைவர் தமிழிசை சவுந்திரராஜன் கூறியுள்ளார். கோவை மாவட்டம் பொள்ளாச்சியில் நடைபெற்ற அக்கட்சியின் செயற்குழு கூட்டத்திற்குப் பின் செய்தியாளர்களிடம் பேசிய அவர், பல்லாயிரக்கணக்கான மக்கள் கூடுவதை தடுக்கத் தவறியதை காவல்துறை ஒப்புக் கொள்ள வேண்டும் என்றும், தூத்துக்குடி விவகாரத்தில் தமிழக உளவுத்துறை தோல்வியடைந்து விட்டதாகவும் குற்றஞ்சாட்டினார்.