ஊரடங்கிற்கு பின் தொழிற்சாலைகள் இயங்க புதிய வழிகாட்டு நெறிமுறைகள்.!

ஊரடங்கிற்கு பின் தொழிற்சாலைகளை இயக்குவதற்கான வழிகாட்டுதல்களை வெளியிட்டது தமிழக அரசு.

கொரோனா வைரஸ் தடுப்பு நடவடிக்கைகள் குறித்து அனைத்து மாவட்ட ஆட்சியர்களுடன் முதல்வர் பழனிசாமி இன்று சென்னை தலைமை செயலகத்தில் காணொளிக்காட்சி மூலம் ஆலோசனை மேற்கொண்டார். அப்போது, பேசிய முதல்வர் பழனிசாமி, அரசு அறிவிக்கும் அனைத்து விதிமுறைகளை பொதுமக்கள் கடைப்பிடித்தால் மட்டுமே கொரோனா பரவலை தடுக்க முடியும் என்றும் எந்தளவிற்கு பொதுமக்கள் ஒத்துழைப்பு தருகிறார்களோ, அந்த அளவிற்கு ஊரடங்கு தளர்வு செய்யப்படும் என தெரிவித்தார். 

இந்நிலையில், தமிழகத்தில் ஊரடங்கிற்கு பின் தொழிற்சாலைகள் இயங்க வழிகாட்டு நெறிமுறைகளை தமிழக அரசு வெளியிட்டுள்ளது. முதல் வாரத்தில் ஆலையின் ஒட்டுமொத்த கொள்திறனுக்கு உற்பத்தி செய்யக்கூடாது எனவும் வழிகாட்டு முறைகளை பின்பற்ற உத்தரவிட்டுள்ளது. இதனிடையே வரும் மே 17 ஆம் தேதியுடன் நிறைவடைய இருக்கும் நிலையில், நேற்று நாட்டு மக்களிடையே பிரதமர் மோடி உரையாற்றினார். அப்போது நாடு முழுவதும் நான்காவது கட்ட ஊரடங்கை அறிவித்தார். இதன் விவரங்கள் விரைவில் வெளியிடப்படும் என்றும் தெரிவித்திருந்தார் என்பது குறிப்பிடத்தக்கது. 

ஊரடங்கிற்கு பின் தொழிற்சாலைகள் இயங்க புதிய வழிகாட்டு நெறிமுறைகள் :

• முதல் வாரம் ஆலையின் ஒட்டுமொத்த கொள்திறனுக்கும் உற்பத்தி செய்யக்கூடாது என்றும் முதல் வாரம் முழுவதும் சோதனை முறையில் மட்டுமே ஆலையை இயக்க வேண்டும்.
• தொழிற்சாலையில் உள்ள அனைத்து உபகரணங்களும், கருவிகளும் கொள்கலன்களில் உடைப்பு ஏதேனும் கசிவு இருக்கிறதா என்பதை ஆய்வு செய்த பின்பே பணியை தொடங்க வேண்டும்.
• ஒருவர் பயன்படுத்திய கருவியை மற்றொருவர் பயன்படுத்துவதை தவிர்க்க வேண்டும் என்றும் கூடுதல் கருவிகளை வைத்து வேலை செய்ய வேண்டும் எனவும் தமிழக அரசு தெரிவித்துள்ளது.
• குறிப்பாக ஊழியர்கள் ஆலைக்குள் நுழையும் முன்பாகவே உடல் வெப்பம் பரிசோதனை செய்யப்பட வேண்டும் மற்றும் கிருமி நாசினி பயன்படுத்த வேண்டும் என்று தெரிவிக்கப்பட்டுள்ளது.