சேப்பாக்கம் மைதானத்தின் புதிய கேலரி; முதல்வர் இன்று திறந்து வைப்பு.!

சென்னை சேப்பாக்கம் மைதானத்தின், கலைஞர் பெயர் சூட்டப்பட்டுள்ள புதிய பெவிலியனை முதல்வர் ஸ்டாலின் இன்று திறந்துவைக்கிறார்.

சென்னை, சேப்பாக்கம், எம்.ஏ.சிதம்பரம் கிரிக்கெட் மைதானம் கூடுதல் இருக்கைகள் கொண்டு புதுப்பிக்கப்பட்டுள்ளன. கடந்த இரண்டு ஆண்டுகளாக கொரோனா கட்டுப்பாடுகள் எல்லாம் முடிந்து தற்போது புதுப்பொலிவுடன் திறக்கப்பட உள்ளது. மேலும் இந்த புதிய கேலரிக்கு முன்னாள் முதல்வர் கலைஞர் பெயர் வைக்கப்பட்டுள்ளது.

இந்த புதிய கேலரியை முதல்வர் ஸ்டாலின் இன்று திறந்து வைக்கிறார். இந்த திறப்பு விழா இன்று மாலை நடைபெறுகிறது. இந்த விழாவில் முக்கியமாக சி.எஸ்.கே அணியின் தலைவர் எம்.எஸ்.தோனி மற்றும் விளையாட்டுத்துறை அமைச்சர் உதயநிதி ஸ்டாலின் ஆகியோர் கலந்து கொள்கின்றனர்.

ஏற்கனவே இந்த மைதானத்தில் மறைந்த முன்னாள் முதல்வர் அண்ணா வின் பெயர் சூட்டப்பட்டு அண்ணா பெவிலியன் அமைந்துள்ளது. சேப்பாக்கம் மைதானம் கடைசியாக 2011 ஆம் ஆண்டு உலகக்கோப்பை தொடருக்கு பின் புதுப்பிக்கப்பட்டது. தற்போது கூடுதல் இருக்கைகள் அமைக்கப்பட்டு புதுப்பிக்கப்பட்டுள்ளது. புதுப்பிப்பு பணிகளுக்கு பின் சேப்பாக்கம் மைதானத்தில், முதல் போட்டியாக இந்தியா-ஆஸ்திரேலியா இடையேயான மூன்றாவது ஒருநாள் போட்டி வரும் மார்ச் 22இல் நடைபெறுகிறது.