தீர்மானம் நிலுவையில் இருந்தால் நிராகரிப்பதாக பொருள் – ஆளுநர் ரவி

அரசியலமைப்பின்படி அரசியல் அமைப்பை பாதுகாப்பதே ஆளுநரின் கடமை என தமிழக ஆளுநரின் பேச்சு.

குடிமைப்பணி தேர்வுக்கு தயாராகும் மாணவர்களுடனான கலந்துரையாடலில் பேசிய ஆளுநர் ஆர்என் ரவி, ஆளுநர் ஒரு தீர்மானத்திற்கு ஒப்புதல் அளிக்காமல் நிலுவையில் வைத்திருந்தால் அதற்கு நிராகரிப்பதாக பொருள். அதாவது, வார்த்தை அலங்காரத்துக்காக நிறுத்தி வைப்பு என்கிறோம்,  கிடப்பில் போடப்பட்ட மசோதாக்கள் நிராகரிக்கப்பட்டதாக அர்த்தம் என பேரவையில் இயற்றிய தமிழக அரசு நீட் விலக்கு உள்ளிட்ட மசோதாக்கள் குறித்து மறைமுகமாக கூறியுள்ளார்.

சட்டசபையில் நிறைவேற்றப்படும் தீர்மானங்கள் (மசோதாக்கள்), ஆளுநர் ஒப்புதல் அளிக்காமல் அது சட்டமாக முடியாது. இரண்டாவது முறையாக ஆளுநர் ஒப்புதல் அளிக்கவில்லை என்றால் 3வது வாய்ப்பு குடியரசுத்தலைவருக்கு அனுப்புவது தான் எனவும் குறிப்பிட்டார். அரசியலமைப்பின்படி அரசியல் அமைப்பை பாதுகாப்பதே ஆளுநரின் கடமை. பொது பட்டியலில் உள்ளவைக்கும் மத்திய அரசு சட்டம் இயற்றாவிடினும் மாநில அரசு சட்டம் இயற்றலாம் எனவும் கூறியுள்ளார்.

ஆனால், மாநில அரசின் சட்டம் மத்திய அரசின் சட்டத்துடன் பொருந்த வேண்டும். பேரவையின் தீர்மானம் அரசியல் அமைப்பின் விதிக்கு உட்பட்டு இருக்கிறதா என கண்காணிக்க வேண்டும். சட்டப்பேரவையில் நிறைவேற்றினால் மட்டும் சட்டம் ஆகாது, சட்டசபையும் ஒரு அங்கம் மட்டும் தான் என தெரிவித்தார்.