#Helicopter Crash : விபத்துக்குள்ளான ராணுவ ஹெலிகாப்டரின் கருப்புப்பெட்டி கண்டெடுப்பு..!

குன்னூர் அருகே விபத்துக்குள்ளான ஹெலிகாப்டரின் கறுப்பு பெட்டி கண்டுபிடிக்கப்பட்டுள்ளது.

ராணுவ ஹெலிஹாப்டர் குன்னூர் அருகே வானில் பறந்து கொண்டிருந்தபோது விபத்துக்குள்ளாகி முழுமையாக எரிந்துள்ளது.சூலூர் விமானப்படை தளத்தில் இருந்து வெலிங்க்டனுக்கு சென்ற போது, காட்டேரி என்ற பகுதி அருகில் கீழே விழுந்து விபத்துக்குள்ளானது. இந்த ஹெலிகாப்டரில் முப்படைகளின் தளபதி பிபின் ராவத் உட்பட 14 பேர் பயணித்துள்ளனர்.

இந்நிலையில், முப்படை தளபதி பிபின் ராவத் மற்றும் அவரது மனைவி மதுலிகா ராவத் உட்பட 11 ராணுவ வீரர்கள் உயிரிழந்துள்ளதாக இந்திய விமான படை அதிகாரபூர்வமாக அறிவித்துள்ளது. முப்படை தளபதி பிபின் ராவத் மற்றும் அவரது மனைவியின் உடல்கள் இன்று ராணுவ விமானம் மூலம் டெல்லி கொண்டு செல்லப்படுகின்றன. நாளை இறுதி சடங்கு நடைபெறவுள்ளது.

இந்நிலையில், குன்னூர் அருகே விபத்துக்குள்ளான ஹெலிகாப்டரின் கறுப்பு பெட்டி கண்டுபிடிக்கப்பட்டுள்ளது. இந்த பெட்டி காட்டேரி நச்சபுராசத்திரம் மலைப்பகுதியில் கண்டெடுக்கப்பட்டுள்ளது. டெல்லியில் இருந்து வந்த தொழிநுட்பக்குழு, வெலிங்டன் ராணுவ மைய குழு இந்த கருப்பு பெட்டியை கண்டுபிடித்துள்ளனர்.

விபத்து நடந்த காட்டேரி பகுதியில் இருந்து கருப்புப்பெட்டி உள்ளிட்ட 3 பொருட்களை ராணுவ அதிகாரிகள் மீட்டனர். மேலும் மீட்கப்பட்டுள்ள கறுப்புப்பெட்டியை பெங்களூர்  கொண்டு சென்று ஆய்வு செய்ய முடிவு எடுக்கப்பட்டுள்ளது.