ஈரோடு கிழக்கு இடைத்தேர்தல் : 286 வாக்குப்பதிவு இயந்திரங்கள் ஒப்படைப்பு.!

ஈரோடு கிழக்கு இடை தேர்தலுக்காக 286 மின்னணு வாக்குப்பதிவு இயந்திரங்களை ஈரோடு கிழக்கு இடைத்தேர்தல் நடத்தும் தேர்தல் அலுவலர் சிவகுமாரிடம் வருவாய் கோட்டாட்சியர் சதீஷ்குமார் ஒப்படைத்தார்.

ஈரோடு கிழக்கு சட்டமன்ற தொகுதியில் வரும் பிப்ரவரி 27ஆம் தேதி இடைத்தேர்தல் நடைபெற உள்ளது. இந்த தேர்தலை எதிர்கொள்ள பிரதான கட்சிகள் தங்களது வேட்பாளர்களையும், தங்களது நிலைப்பாட்டையும் அறிவித்த வண்ணம் இருக்கின்றனர். கூட்டணி குறித்த பேச்சு வார்த்தையும் தொடர்ந்து நடைபெற்ற வண்ணம் இருக்கிறது.

அரசியல் கட்சிகளைப் போல தேர்தல் அதிகாரிகளும் தேர்தலுக்கான பணிகளை முழுவீச்சில் ஆரம்பித்து உள்ளனர். ஏற்கனவே அனைத்து கட்சி பிரதிநிதிகள் முன்னிலையில் தேர்தல் வாக்கு பதிவு எந்திரங்களை கொண்டு மாதிரி வாக்குப்பதிவு நடைபெற்றது. தற்போது அதனை தொடர்ந்து இடை தேர்தலுக்காக 286 மின்னணு வாக்குப்பதிவு எந்திரங்களை ஈரோடு கிழக்கு இடை தேர்தல் நடத்தும் தேர்தல் அலுவலர் சிவகுமாரிடம் வருவாய் கோட்டாட்சியர் சதீஷ்குமார் ஒப்படைத்தார்.

தேர்தல் மின்னணு வாக்குப்பதிவு இயந்திரங்களை ஒப்படைக்கும் நிகழ்வானது அனைத்து கட்சி பிரதிநிதிகள் முன்னிலையில் நடந்தது. அந்த மின்னனு வாக்குப்பதிவு எந்திரங்களானது ஈரோடு மாநகராட்சி அலுவலகத்திற்கு கொண்டு செல்லப்பட்டுள்ளது. அங்கு காவலர்கள் பாதுகாப்புடன் பாதுகாப்பாக வைக்கப்பட உள்ளது.