ஈரோடு கிழக்கு இடைத்தேர்தல்; மாவட்ட செயலாளர்களுடன் ஓபிஎஸ் இன்று ஆலோசனை.!

ஈரோடு கிழக்கு இடைத்தேர்தலை முன்னிட்டு மாவட்ட செயலாளர்களுடன் ஓ.பன்னீர்செல்வம் இன்று ஆலோசனை நடத்துகிறார்.

அடுத்த வாரம் திங்கள் கிழமை(பிப்-27) இல் ஈரோடு கிழக்கு தொகுதிக்கான இடைத்தேர்தல் நடைபெற உள்ள நிலையில், தேர்தல் களத்தில் பிரச்சாரங்கள் அனல் பறக்கின்றன. இடைத்தேர்தல் நாள் நெருங்க நெருங்க, தேர்தல் களமும் பரபரப்பாகிக் கொண்டு செல்கிறது. திமுக கூட்டணி மற்றும் அதிமுக கூட்டணி என பிரச்சாரங்கள் நாளுக்கு நாள் சூடு பிடிக்கிறது.

இதில் திமுக கூட்டணி சார்பில் காங்கிரஸ் கட்சி வேட்பாளர் இ.வி.கே.எஸ்.இளங்கோவன் அவர்களும் அதிமுக சார்பில் முன்னாள் எம்எல்ஏ தென்னரசு அவர்களும் போட்டியிடுகின்றனர். இந்த நிலையில் ஈரோடு கிழக்கு தொகுதி இடைத்தேர்தல் தொடர்பாக பிரச்சாரத்தில் மேற்கொள்வது பற்றி, இன்று மாவட்ட செயலாளர்கள் மற்றும் கழக நிர்வாகிகளுடன் ஓ.பன்னீர் செல்வம் ஆலோசனை நடத்துகிறார்.

மேலும் வரும் 25 ஆம் தேதி மறைந்த முன்னாள் முதலமைச்சர் ஜெயலலிதாவின் பிறந்தநாள் கொண்டாடப்பட இருப்பதால் பிறந்தநாள் விழா கொண்டாட்டம் குறித்தும், ஓ.பன்னீர் செல்வம் ஆலோசனை மேற்கொள்வார் என்று தகவல் தெரிவிக்கிறது.