செந்தில் பாலாஜிக்கு அமலாக்கத்துறை காவல்… இரு நீதிபதிகள் அமர்வு இன்று தீர்ப்பு.!
அமைச்சர் செந்தில் பாலாஜிக்கு இரு நீதிபதிகள் அமர்வு, அமலாக்கத்துறை காவலில் எடுப்பது குறித்து இன்று தீர்ப்பு வழங்குகிறது.
அமலாக்கத்துறையால் அமைச்சர் செந்தில் பாலாஜி கடந்த மாதம் கைது செய்யப்பட்டு, விசாரணைக்கு அழைத்துச்செல்லப்படும் போது நெஞ்சுவலி ஏற்பட்டு ஓமந்தூரார் அரசு மருத்துவமனையில் அனுமதிக்கப்பட்டு சிகிச்சை பெற்றுவந்த நிலையில், தனியார் மருத்துவமனையில் மாற்றப்பட்டு அறுவை சிகிச்சை மேற்கொள்ளப்பட்டது.
இதையடுத்து செந்தில் பாலாஜி கைது செய்யப்பட்டது சட்டவிரோதம் எனக்கூறி அவரது மனைவி, ஆட்கொணர்வு மனு தாக்கல் செய்திருந்தார். இந்த வழக்கில் நீதிபதிகள் நிஷா பானு, மற்றும் பரத சக்கரவர்த்தி அமர்வு மாறுபட்ட தீர்ப்பு வழங்கிய நிலையில் மூன்றாவது நீதிபதி கார்த்திகேயன் அமர்வுக்கு மாற்றப்பட்டது.
இந்த வழக்கில் இரு தரப்பு வாதங்களும் விசாரிக்கப்பட்டு மூன்றாவது நீதிபதி கார்த்திகேயன், தனது தீர்ப்பில் அமைச்சர் செந்தில் பாலாஜி கைது செய்யப்பட்டது செல்லும், அவர் சட்டத்திற்கு உட்பட்டவர் என்றும் செந்தில் பாலாஜியை கைது செய்து விசாரிக்க அமலாக்கத்துறைக்கு அதிகாரம் உள்ளது என்றும் தீர்ப்பு வழங்கி, நீதிபதி பரத சக்கரவர்த்தி தீர்ப்பில் தான் ஒத்துப்போவதாக கூறினார்.
மேலும் ஏற்கனவே வழக்கை விசாரித்த இரு நீதிபதிகள் அமர்வு இதனை மீண்டும் விசாரிக்கும் என அறிவித்த நிலையில், இன்று இரு நீதிபதிகள் அமர்வு அமைச்சர் செந்தில் பாலாஜியை எப்போது அமலாக்கத்துறை காவலில் எடுக்கும் என்பது குறித்து பிற்பகல் தீர்ப்பு வழங்க இருக்கின்றனர்.
